Грошы ад аўкцыёну Саша Філіпенка пойдуць у дапамогу людзям, якія ў Расеі адкрыта выступаюць супраць вайны.
Пісьменнік выставіў на продаж пяць вялікіх літаратурных узнагародаў, якія ён атрымаў у Расеі: прэмію «Ясная Поляна», «Русская Премия», прэміі часопісаў «Знамя», «Сноб» і «Собака».
«Усе гэтыя прызы я заўсёды расцэньваў як авансы, усімі гэтымі прэміямі даражыў, а таму сёння надзвычай цешуся і ганаруся, што магу выставіць статуэткі на дабрачынны аўкцыён, усе грошы ад якога пойдуць у дапамогу людзям, якія адкрыта выступаюць супраць вайны. Магчыма, кнігі не могуць спыніць кровапраліцце, але іх рэха часам можа камусьці дапамагчы», – напісаў Філіпенка ў Фэйсбуку.
Атрыманыя ад аўкцыёну грошы будуць пералічаныя на рахунак праваабарончай арганізацыі Маскоўская Хельсінкская група, якая накіруе іх на карысць расейскіх палітвязняў.
Філіпенка таксама заявіў, што сваю першую ўзнагароду – Дыплём беларускага ПЭН-цэнтра – ён пакуль пакідае сабе.
«Але калі вы раптам хочаце займець яе, а ўсе грошы перавесці на дапамогу беларускім палітвязням – я саступлю», – напісаў пісьменнік.
Глеб Нержын belsat.eu