Авіякампаніі іншых краін, не чакаючы афіцыйных забаронаў, вырашылі пазбягаць паветраную прастору Беларусі. Пра гэта паведамляе «Еўрарадыё».
Гэтак, прынамсі два рэйсы авіякампаніі «AirBaltic» ужо абляцелі Беларусь бокам.
Гэтак, рэйс Рыга – Адэса паляцеў праз Польшчу, а Рыга – Тбілісі – праз Расею. Найкарацейшым шляхам для абодвух з іх з’яўляецца пралёт праз Беларусь.
«Наша нацыянальная авіякампанія «AirBaltic» бесперапынна сочыць за сітуацыяй з бяспекай у паветранай прасторы розных краін. І ўжо прыняла рашэнне пакуль не выкарыстоўваць паветраную прастору Беларусі ў сваіх палётах. Са сваімі рэкамендацыямі выступіць і Латвійскае агенцтва грамадзянскай авіяцыі. Ведаю, што і Міжнародная арганізацыя грамадзянскай авіяцыі запрасіла ўсю інфармацыю ад перавознікаў і краін-аператараў. У бліжэйшыя дні, відавочна, будуць вынесеныя канкрэтныя рэкамендацыі ў гэтым пытанні», – патлумачыў міністр транспартных сувязяў Латвіі Таліс Лінкайтс, перадае DELFI.
Нагадаем, што старшыня камітэту замежных справах Сенату ЗША Роберт Менендэс разам з шэрагам заканадаўцаў з Вялікай Брытаніі, Ірландыі, Латвіі, Літвы, Польшчы, Чэхіі і Нямеччыны заклікаў Міжнародную арганізацыю грамадзянскай авіяцыі правесці неадкладнае расследаванне прымусовага прызямлення ў Менску рэйсу Афіны – Вільня, у выніку чаго быў затрыманы апазіцыйны блогер Раман Пратасевіч.
Да правядзення расследавання яны заклікалі адхіліць Беларусь ад арганізацыі і ўвесці забарону на ўсе палёты над Беларуссю, уключаючы палёты ў краіну і з яе.
МГ belsat.eu