У панядзелак 25 красавіка пачнецца суд над каардынатаркай валанцёрскай службы «Вясны» Марфай Рабковай. Разам з ёй Менскі гарадскі суд будзе разглядаць справу валанцёра Андрэя Чапюка, палітзняволеных актывістаў анархісцкага руху Акіхіра Гаеўскага-Ханады, Аляксандра Францкевіча, Аляксея Галаўко, Аляксандра Казлянкі, Паўла Шпетнага, Мікіты Дранца, Андрэя Марача, Данілы Чулы. Справу будзе разглядаць суддзя Сяргей Хрыпач, паведамляе «Вясна».
Палітзняволеных абвінавачваюць на падставе 10 артыкулаў Крымінальнага кодэксу. Траіх з іх, у тым ліку Марфу Рабкову, СК характарызуе як «арганізатараў і кіраўнікоў шэрагу арганізаваных злачынных групаў, што мелі аўтаномныя ячэйкі ў рэгіёнах Беларусі са сваімі лідарамі».
Суд мае быць адкрытым, таму можна прыйсці падтрымаць палітвязняў у будынку Мінскага гарадскога суда (вул. Дуніна-Марцінкевіча, 1/3). Таксама можна падтрымаць іх лістамі салідарнасці на адрас: СІЗА № 1, вул. Валадарскага, д. 2, 220030, г. Менск.
Нагадаем, што Марфу Рабкову ўтрымліваюць пад вартай з 17 верасня 2021 года. Марфе выставілі абвінавачванне паводле ч. 3 арт. 293 Крымінальнага кодэксу (навучанне ці іншае рыхтаванне асобаў для ўдзелу ў масавых беспарадках, або фінансаванні такой дзейнасці). Адміністрацыя СІЗА № 1 не дае дзяўчыне належнай медычнай дапамогі і таксама ўчыняе ціск.
ЗХ belsat.eu