Сусветная арганізацыя здароўя папярэджвае, што жыццё тысячаў людзей у Марыупалі ды іншых гарадах на ўсходзе Украіны – пад пагрозай праз амаль поўнае знішчэнне сістэмы аховы здароўя.
Прадстаўнікі органаў аховы здароўя ААН настойваюць, каб ім надалі неадкладны доступ у Марыупаль ды іншыя раёны, найбольш пацярпелыя ад баявых дзеянняў на ўсходзе Украіны. Яны сцвярджаюць, што маюць інфармацыю пра тое, што амаль усе медычныя ўстановы і шпіталі ў Луганскай вобласці ці пашкоджаныя, ці разбураныя, піша «Голас Амерыкі».
Прадстаўнік Сусветнай арганізацыі здароўя Бгану Бгатнагар (Bhanu Bhatnagar) падчас выступу ў Львове заявіў, што САЗ дагэтуль не змагла атрымаць доступу да жыхароў Марыупалю, якім патрэбная дапамога, і не мае звестак пра стан здароўя тых, хто застаецца на акупаваных тэрыторыях.
«Нам патрэбнае спыненне баявых дзеянняў прынамсі на два дні, каб даставіць жыццёва важныя прадметы забеспячэння, а таксама ацаніць патрэбы ў галіне аховы здароўя, – сказаў Бгатнагар. – Мы чакаем горшага. Сістэма аховы здароўя разбураная, і гэта цягне за сабой усе магчымыя наступствы. Ёсць параненыя, якім патрэбная дапамога».
Прадстаўнік САЗ таксама зазначыў, што на ўсходзе Украіны ёсць людзі з хранічнымі хваробамі ды іншымі патрэбамі ў медычнай дапамозе, якія не маюць доступу да жыццёва важных лекаў.
«У дзвюх з пяці хатніх гаспадарак прынамсі адзін сямейнік мае хранічныя хваробы, такія, як рак, дыябет ці хваробы сэрца, – сказаў Бгатнагар. – З іх кожны трэці мае цяжкасці з доступам да медычнай дапамогі ў сувязі са сваймі хваробамі. Нашае апытанне таксама паказвае, што вайна ўплывае на паводзіны людзей, якія звяртаюцца па медычную дапамогу: менш чым у траціне хатніх гаспадарак заявілі, што змаглі звярнуцца па медыцынскія паслугі».
39 % апытаных сцвярджаюць, што сітуацыя з бяспекай замінае ім звярнуцца па дапамогу, у той час як 27 % кажуць, што ў іхных раёнах медычных паслуг увогуле не надаюць.
САЗ пацвердзіла 162 факты нападаў на медычныя ўстановы і персанал, у выніку якіх загінулі прынамсі 73 чалавекі.
ГГ, belsat.eu