Прэзідэнт ЗША прызнаў генацыд армянаў

Прэзідэнт ЗША Джо Байдэн выступіў з заявай, у якой адзначыў, што падзеі, якія адбыліся ў Асманскай імперыі ў пачатку XX стагоддзя, з’яўляюцца генацыдам супраць армянскага народа. Заява апублікаваная на сайце Белага дому.

Джо Байдэн выступіў з заявай, у якой заявіў пра ўшанаванне армянскіх ахвяраў, якія загінулі ў пачатку 20-га стагоддзя.

«Кожны год у гэты дзень мы ўзгадваем жыццё ўсіх тых, хто загінуў у генацыдзе армянаў эпохі Асманскай эпохі, і мы зноў абавязваемся перадухіліць такое зверства. Пачынаючы з 24 красавіка 1915 году пасля арышту асманскімі ўладамі ў Канстанцінопалі армянскіх інтэлектуалаў і лідараў грамадскіх супольнасцяў, паўтары мільёны армянаў былі дэпартаваныя і забітыя», – гаворыцца ў заяве.

Прэзідэнт ЗША падкрэсліў, што многія армяне знайшлі свой дом у Злучаных штатах і на працягу дзесяцігоддзяў армянскія мігранты ўзбагацілі ЗША.

28 кастрычніка 2019 года Палата прадстаўнікоў ЗША прыняла рэзалюцыю аб прызнанні генацыду армянаў. Гэтая рэзалюцыя фармальна азначае, што ЗША прызналі генацыд, хоць яна і мела рэкамендацыйны характар. 12 снежня 2019 года Сенат ЗША аднагалосна прыняў аналагічную рэзалюцыю аб прызнанні генацыдам масавага забойства армянаў у Асманскай імперыі ў пачатку XX стагоддзя. Джо Байдэн падчас выбарчай кампаніі абяцаў, што прызнае забойствы армянаў у асманскай імперыі генацыдам.

Падчас масавых забойстваў армянскага насельніцтва ў Асманскай імперыі загінула, паводле розных падлікаў, ад 660 тысячаў да 1,5 млн чалавек. Турцыя і Азербайджан не прызнаюць падзеі 1915 года генацыдам, але прызнаюць шматлікія ахвяры сярод гэтага народа.

На постсавецкай прасторы генацыд армянаў прызнала толькі Расея.

«Прапаганда перасягае межы прыстойнасці». Як рэжым выкарыстоўвае тэму Галакосту ў барацьбе з пратэстоўцамі

СК belsat.eu

 

Hавiны