Чарговы шэраг беларускіх адвакатаў не прайшоў пазачарговай пераатэстацыі. Пра гэта паведамляе TUT.by.
Сярод тых, хто не прайшоў пераатэстацыю – адвакат Сяргей Зікрацкі, які абараняў журналістку «Белсату» Кацярыну Андрэеву, TUT.BY і супрацоўнікаў Прэс-клубу.
«Кваліфікацыйная камісія прызнала, што я валодаю недастатковай кваліфікацыяй, каб у далейшым працаваць адвакатам. Члены Кваліфікацыйнай камісіі прагаласавалі. Я яшчэ нейкі час папрацую, пакуль у мяне афіцыйна не забяруць ліцэнзію, але тое, што яе забяруць, – хутчэй ужо пытанне тэхнічнае, чым юрыдычнае. Наступнае пасяджэнне Кваліфікацыйнай камісіі, дзе будзе вырашацца гэтае пытанне, павінна адбыцца 22 красавіка», – распавёў адвакат.
Ён не выключыў, што камісію могуць склікаць і раней.
Нагадаем, падставаю для выкліку на пераатэстацыю стаў шэраг каментароў Сяргея Зікрацкага ў медыях. Міністэрства юстыцыі палічыла, што гэтыя каментары не цалкам адпавядаюць заканадаўству, а таму сведчаць аб неналежным выкананні адвакатам сваіх прафесійных абавязкаў.
Пазачарговую пераатэстацыю не прайшлі таксама Вольга Баранчык і Барыс Ляскоўскі. Яны былі адпаведна старшынёй і сябрам дысцыплінарнай камісіі Менскай абласной калегіі адвакатаў, перадае «Еўрарадыё».
За апошнія некалькі месяцаў Мінюст пазбавіў ліцэнзіі адвакатаў Марыі Калеснікавай Аляксандра Пыльчанку і Людмілу Казак. Акрамя таго, ліцэнзіяў пазбаўленыя адвакаты Канстанцін Міхель, Міхаіл Кірылюк, Максім Конан, Юлія Леванчук. Без ліцэнзіі можа застацца Уладзімір Сазанчук, які абараняе палітыка Мікалая Статкевіча, блогера Дзмітрыя Казлова і журналістку Кацярыну Андрэеву.
Таксама рыхтуецца законапраект «Аб змяненні законаў у пытаннях адвакацкай дзейнасці», які можа забараніць адвакатам, якія працуюць індывідуальна, і адвакацкім бюро абараняць людзей у крымінальных і адміністратыўных справах.
МГ belsat.eu