Акцыі пратэсту супраць фальсіфікацыяў з патрабаваннем адстаўкі Лукашэнкі, прававога бязмежжа і гвалту сілавікоў працягваюцца ў Беларусі 228 дзён. «Белсат» падводзіць вынікі гэтага дня.
24 сакавіка Рада ў правах чалавека Арганізацыі Аб’яднаных Нацыяў прыняла рэзалюцыю аб Беларусі.
За рэзалюцыю, прапанаваную Еўрапейскім Звязам, прагаласавалі 20 краінаў, супраць – 6. Яшчэ 20 устрымаліся. Галасавалі супраць Венесуэла, Кітай, Куба, Расея, Філіпіны і Эрытрэя.
Дакумент абавязвае офіс Вярхоўнага камісара ААН у сферы правоў чалавека збіраць, аналізаваць і захоўваць доказы рэпрэсіяў у Беларусі падчас і пасля прэзідэнцкіх выбараў 2020 года для прыцягнення вінаватых да адказнасці.
Вярхоўны камісар ААН у правах чалавека Мічэль Бачэлет 25 лютага ў Жэневе на 46-й сесіі Рады ААН у справе правоў чалавека прэзентавала справаздачу аб сітуацыі ў Беларусі.
«Падзеі, якія разгарнуліся да і беспасярэдне пасля выбараў, прывялі да крызісу беспрэцэдэнтных маштабаў у галіне правоў чалавека», – заявіла спадарыня Бачэлет.
Улады рыхтуюць тэракт «напярэдадні адной з самых чаканых сёння ў Беларусі падзеяў – Дня Волі». Пра гэта ў сваім тэлеграм-канале паведамляе ініцыятыва беларускіх сілавікоў «BYPOL».
Як заяўляецца, тэракт 25 сакавіка «развяжа дыктатару рукі для ўвядзення ў краіне надзвычайнага становішча» дзеля «дыскрэдытацыі пратэставага руху і яго поўнай ліквідацыі сіламі Камітэту дзяржаўнай бяспекі». Злачынства нібыта рыхтуецца «ў адным з будынкаў органаў унутраных справаў».
Былы супрацоўнік спецпадраздзялення «Алмаз» МУС Беларусі Ігар Макар звярнуўся з відэазваротам да кіраўніка КДБ Беларусі Івана Церцеля. У выступе былы спецназавец заявіў, што мае доказы таго, што ў Беларусі да Дня Волі рыхтуюцца правакацыі, якія могуць прывесці да ахвяраў. Паводле яго, у выпадку ўчынення правакацыяў кіраўнік КДБ нашмат хутчэй апынецца на лаве падсудных у новай Беларусі.
Старшыні Саюзу палякаў у Беларусі Анджэліцы Борыс прызначылі 15 содняў адміністратыўнага арышту. Кіраўніцу арганізацыі абвінавацілі ў парушэнні парадку арганізацыі або правядзення масавага мерапрыемства, паведаміў «Белсату» гарадзенскі журналіст і сябра Саюзу палякаў Анджэй Пачобут.
«Судзілі паводле артыкулу за нелегальнае масавае мерапрыемства. У прыватнасці, за кірмаш Казюк, які ладзіцца на ўгодкі смерці святога Казіміра. Штогод адзначаецца свята ў Горадні, а вось сёлета такім чынам да гэтага паставіліся. Суд быў закрыты, на тэрыторыі ІЧУ. Сведкамі былі міліцыянты. Быў толькі адвакат, больш нікога не пусцілі», – распавёў «Белсату» гарадзенскі журналіст і сябра Саюзу палякаў Анджэй Пачобут.
Вядомую перакладчыцу і выкладчыцу англійскай мовы Вольгу Калацкую суд прызнаў вінаватай у злосным хуліганстве за тое, што жанчына падчас адной з акцыяў пратэсту ўдарыла працаўніка СТВ Грыгорыя Азаронка, паведамляе праваабарончы цэнтр «Вясна».
Пацярпелы Азаронак на судзе сведчыў, што заяўляў, каб Калацкую не прыцягвалі да адказнасці, бо ён не мае матэрыяльных прэтэнзіяў да абвінавачанай і не чакае выбачэнняў, бо не лічыць сябе абражаным.
Вольга распавядала, што была абражаная пытаннямі ды паводзінамі Азаронка і ў стане эмацыйнага ўзбуджэння, не стрымаўшыся, дала яму поўху – гэта быў чыста сімвалічны жэст.
Суд пакараў Вольгу Калацкую абмежаваннем волі тэрмінам на 2 гады без накіравання ў папраўчую ўстанову адкрытага тыпу.
У судзе Фрунзенскага раёну сталіцы вынеслі прысуд палітвязню, дызайнеру Дзмітрыю Кубараву. Палітычнага зняволенага прызналі вінаватым паводле ч. 1 арт. 293 КК («Арганізацыя масавых беспарадкаў») і пакаралі 7 гадамі калоніі ўзмоцненага рэжыму, паведамляе карэспандэнт «Белсату».
Паводле абвінавачання, з 9 да 12 жніўня Дзмітрый Кубараў заклікаў людзей да актыўнага ўдзелу ў масавых беспарадках. А таксама і сам арганізоўваў масавыя беспарадкі і ўдзельнічаў у іх. Акрамя таго, ён меў намер рабіць кактэйлі Молатава.
Дызайнера Дзмітрыя Кубарава затрымалі 11 жніўня. На судзе Дзмітрый не прызнаў сваю віну і заявіў, што яго катавалі пасля затрымання.
Сярод тых, хто не прайшоў пераатэстацыю – адвакат Сяргей Зікрацкі, які абараняў журналістку «Белсату» Кацярыну Андрэеву, TUT.BY і супрацоўнікаў Прэс-клубу. Пазачарговую пераатэстацыю не прайшлі таксама Вольга Баранчык і Барыс Ляскоўскі. Яны былі адпаведна старшынёй і сябрам дысцыплінарнай камісіі Менскай абласной калегіі адвакатаў
«Кваліфікацыйная камісія прызнала, што я валодаю недастатковай кваліфікацыяй, каб у далейшым працаваць адвакатам. Члены Кваліфікацыйнай камісіі прагаласавалі. Я яшчэ нейкі час папрацую, пакуль у мяне афіцыйна не забяруць ліцэнзію, але тое, што яе забяруць, – хутчэй ужо пытанне тэхнічнае, чым юрыдычнае. Наступнае пасяджэнне Кваліфікацыйнай камісіі, дзе будзе вырашацца гэтае пытанне, павінна адбыцца 22 красавіка», – распавёў Сяргей Зікрацкі.
Ён не выключыў, што камісію могуць склікаць і раней.
Нагадаем, падставаю для выкліку на пераатэстацыю стаў шэраг каментароў Сяргея Зікрацкага ў медыях. Міністэрства юстыцыі палічыла, што гэтыя каментары не цалкам адпавядаюць заканадаўству, а таму сведчаць аб неналежным выкананні адвакатам сваіх прафесійных абавязкаў.
СК belsat.eu