200 дзён паслявыбарчых пратэстаў. Новыя відэасведчанні збіцця сілавікамі людзей у жніўні, бясконцыя суды
З моманту прэзідэнцкіх выбараў у Беларусі 9 жніўня мінулага году прайшло роўна 200 дзён. «Белсат» сабраў галоўныя падзеі гэтага дня.
Новае сведчанне збіцця сілавікамі людзей у жніўні
Telegram-канал «Нік і Майк» апублікаваў відэа разгону і збіцця сілавікамі наведнікаў крамы ў Менску 11 жніўня. Відэа знятае ў краме «Алмі» на вуліцы Прытыцкага ў сталіцы 11 жніўня.
На відэа сілавікі ў поўнай амуніцыі ўварваліся ў краму і пачалі жорстка збіваць людзей. На кадрах бачна, што сілавікі збіваюць як мужчын, так і жанчын, хапаюць маладых людзей за валасы і кладуць людзей на падлогу.
Іншыя злачынствы сілавікоў не толькі ў жніўні, але і на працягу 200 дзён «Белсат» сабраў у адной публікацыі
Пераслед, суды і новыя абвінавачванні
Увечары 22 лютага берасцейскі актывіст Андрэй Шарэнда выйшаў з мясцовага ізалятару часовага ўтрымання пасля 12 содняў арышту. А сёння ён распавёў «Белсату», што ягоную жонку Паліну Шарэнду-Панасюк 23 лютага з берасцейскага СІЗА № 7 этапавалі ў «Навінкі».
У РНПЦ псіхічнага здароўя, што месціцца ў cталічным мікрараёне Навінкі, Паліна Шарэнда-Панасюк на працягу двух тыдняў будзе праходзіць судовую псіхалагічна-псіхіятрычную экспертызу.
«Лічу, што гэта ціск на чалавека, каб маральна зламаць, помста за пазіцыю. Яна не прызнае следчых, якія ходзяць да яе, і не дае ніякіх паказанняў, бо лічыць іх злачынцамі», – паведаміў у размове з «Белсатам» Андрэй Шарэнда.
У псіхіятрычным шпіталі жанчына не зможа атрымліваць лістоў. Паліну Шарэнду-Панасюк затрымалі ва ўласнай кватэры 3 студзеня. На яе завялі крымінальную справу паводле арт. 364 («Гвалт або пагроза ўжывання гвалту ў дачыненні працаўніка органаў унутраных справаў»).
Уладзімір Цыгановіч, вядомы як блогер MozgON, перадаў з следчага ізалятару на вуліцы Валадарскага ліст, у якім напісаў, што яму выставілі яшчэ адно абвінавачанне паводле арт. 13 ч. 2 арт. 293 КК РБ («Падрыхтоўка да ўдзелу ў масавых беспарадках»).
Уладзіміра Цыгановіча затрымалі 9 чэрвеня і прысудзілі яму адміністратыўны арышт. А 26 чэрвеня яго перавялі ў СІЗА-1 і прадʼявілі абвінавачанні ў «справе Ціханоўскага» (ч 2. арт 342 КК РБ «Навучанне ці іншая падрыхтоўка асобаў для ўдзелу ў групавых дзеяннях, якія груба парушаюць грамадскі парадак»). Праваабаронцы прызналі блогера палітычным зняволеным.
Працаўнікі Менскага аддзелу ўнутраных справаў на паветраным транспарце склалі пратакол паводле ч. 1 арт. 17.11 КаАП («Распаўсюд або перавоз інфармацыйнай прадукцыі, якая змяшчае заклікі да экстрэмісцкай дзейнасці») у дачыненні журналіста Рамана Васюковіча. У снежні летась у аэрапорце ў журналіста сканфіскавалі ноўтбук і два асобнікі кнігі «Беларускі Данбас». За перавоз кнігі Васюковічу пагражае штраф да 50 базавых велічыняў (1450 рублёў).
У пратаколе адзначаецца, што, згодна з экспертным заключэннем Менскай абласной экспертнай камісіі ў ацэнцы інфармацыйнай прадукцыі з 29 студзеня 2021 года, у кнізе «Беларускі Данбас» ёсць «прыкметы праявы экстрэмізму». Пры гэтым у міліцыі не патлумачылі, дзе яны знайшлі «заклікі да экстрэмісцкай дзейнасці».
Урад загадам вырашыў спыніць рост коштаў
Савет Міністраў пастанавіў прыняць шэраг захадаў для стабілізацыі коштаў на сацыяльна значныя тавары першай неабходнасці. У спісе 62 тавары і 50 лекаў.
Юрыдычным асобам усіх формаў уласнасці і індывідуальным прадпрымальнікам, якія завозяць ці прадаюць на ўнутраным рынку сацыяльна значныя тавары першай неабходнасці, што ёсць у спісе пастановы, да 28 лютага забараняюць падымаць кошты на іх у параўнанні з 24 лютага. Калі тавар трэба прасунуць, яго кошт дазваляюць панізіць.
З 1 сакавіка павышаць кошты дазволяць, але не больш як на 0,2 % у параўнанні з апошнім днём папярэдняга месяца.
Сярод 62 тавараў малако, хлеб, бульба, смятана, яблыкі, запалкі, рыба, соль, цукар-пясок, запалкі. У спіс з 50 лекаў сярод іншых увайшлі «Аспірын», «Анальгін», «Каптапрыл», «Ксілін» і «Эналапрыл».
СК belsat.eu
