200 дзён беларускага пратэсту: ад чэргаў на выбарчыя ўчасткі да журналістаў за кратамі
Беларусы пратэстуюць ужо 200 дзён. Мы узгадалі гэты час.
9 жніўня. Дзень галасавання. Каля выбарчых участкаў чэргі. Вечарам людзі збіраюцца на вуліцах сваіх гарадоў на знак пратэсту супраць фальсіфікацыі выбараў. Для разгону пратэстоўцаў ужываюць гумовыя кулі і слезацечны газ.
10 жніўня. Паведамляюць афіцыйныя вынікі выбараў. Паводле ЦВК за Лукашэнку прагаласавалі больш за 80 %. Увечары ў цэнтры гарадоў зноў збіраюцца пратэстоўцы. Каля метро «Пушкінская» гіне Аляксандр Тарайкоўскі.
11 жніўня. Улады вывозяць Святлану Ціханоўскую ў Літву. У Берасці смяротна раняць Генадзя Шутава.
12 жніўня. З Акрэсціна выпускаюць першых затрыманых. Яны распавядаюць пра тое, што адбываецца ўнутры. У Гомлі гіне Аляксандр Віхор.
13 жніўня. Па ўсёй краіне людзі становяцца ў ланцугі салідарнасці, выказваюцца супраць гвалту. На некалькіх заводах пачынаецца страйк.
14 жніўня. Святлана Ціханоўская абвясціла пра стварэнне Каардынацыйнай рады.
15 жніўня. У Менску развітваюцца з загінулым Аляксандрам Тарайкоўскім. З Белтэлерадыёкампаніі масава звальняюцца работнікі.
16 жніўня. Каля Дому ўраду праходзіць мітынг падтрымання Лукашэнкі. Пасля праходзіць самая масавая акцыя пратэсту – «Марш свабоды».
17 жніўня. Лукашэнка выступае на МЗКЦ, дзе бастуюць рабочыя. Паўла Латушку звальняюць з Купалаўскага тэатру, на знак салідарнасці сыходзіць уся трупа.
18 жніўня. Фонд салідарнасці сабраў больш за мільён еўраў для дапамогі пацярпелым беларусам. Знаходзяць мёртвым Канстанціна Шышмакова.
19 жніўня. Паранены Генадзь Шутаў памірае ў шпіталі.
22 жніўня. Зніклага Мікіту Крыўцова знаходзяць павешаным у Менску.
23 жніўня. 50 тысяч чалавек сталі ў жывы ланцуг ад Вільні да беларускай мяжы на знак салідарнасці. Праходзіць Марш новай Беларусі.
30 жніўня. У дзень нараджэння Лукашэнкі праходзіць Марш міру і незалежнасці. Пасля заканчэння маршу Лукашэнка выйшаў падзякаваць супрацоўнікаў АМАПу.
31 жніўня. Мітрапаліта Тадэвуша Кандрусевіча не пускаюць у Беларусь.
1 верасня. Першыя студэнцкія акцыі пратэсту.
6 верасня. Таварыства ратавання на водах пазбаўляе людзей ад затрыманняў, тады затрымліваюць усю змену ратавальнікаў. У менскай кавярні сілавікі разбіваюць шкло.
7-8 верасня. Марыю Калеснікаву спрабуюць вывезці з Беларусі. На мяжы яна ірве пашпарт, пасля чаго яе затрымліваюць.
10 верасня. Шахцёр «Беларуськалію» Юрый Корзун на знак пратэсту прышпільвае сябе кайданкамі ў шахце і адмаўляецца падымацца.
19 верасня. У Менску праходзіць найбуйнейшы Жаночы марш.
23 верасня. Лукашэнка ладзіць таемную інаўгурацыю. Увечары людзі выходзяць на пратэсты.
29 верасня. Найбуйнейшае медыя краіны, TUT.by, пазбаўляюць статусу СМІ.
2 кастрычніка. Еўразвяз уводзіць першыя санкцыі.
5 кастрычніка. Праходзіць першы Марш пенсіянераў.
10 кастрычніка. Лукашэнка праводзіць круглы стол у СІЗА.
20 кастрычніка. Адзін Тэлеграм-канал прызнаюць экстрэмісцкім.
26 кастрычніка. Святлана Ціханоўская аб’яўляе Агульнанацыянальны страйк.
1 лістапада. Па краіне праходзіць Марш герояў. У Менску ладзяць шэсце да Курапатаў. На затрыманых завялі 231 крымінальную справу.
10 лістапада. На плошчы Пераменаў у Менску адбываецца бойка з Раманам Бандарэнкам.
12 лістапада. Да некаторых студэнтаў прыходзяць з ператрусам з КДБ. Кагосьці затрымліваюць, нехта паспявае з’ехаць з краіны. Памірае Раман Бандарэнка.
15 лістапада. У нядзелю праходзіць Марш памяці Рамана Бандарэнкі, людзі збіраюцца на плошчы Пераменаў. Падчас стрыму затрымліваюць двух журналістак «Белсату»: Кацярыну Андрэеву і Дар’ю Чульцову.
19 лістапада. Затрымліваюць журналістку TUT.by Кацярыну Барысевіч і лекара шпіталю хуткай дапамогі.
10 снежня. Беларусь закрывае наземную мяжу на выезд. Вывешаныя ў вокнах нацыянальныя сцягі прыраўноўваюць да пікетавання.
15 снежня. Блогер і палітвязень Ігар Лосік аб’яўляе бестэрміновую галадоўку.
22 снежня. Затрымліваюць кіраўніцтва Прэс-клубу. У офісе адбываецца ператрус.
1 студзеня. Святлана Ціханоўская выступае з альтэрнатыўным навагоднім віншаваннем.
11 студзеня. Прэзідэнт МФХ Рэнэ Фазэль прыязджае ў Менск на сустрэчу з Лукашэнкам.
13 студзеня. За дапамогу ў аплаце штрафаў журналіста Андрэя Аляксандрава ўзялі пад варту.
16-17 студзеня. Спонсары адмаўляюцца падтрымліваць беларускую частку чэмпіянату свету па хакеі.
18 студзеня. Чэмпіянат свету па хакеі не будзе праходзіць у Беларусі.
22 студзеня. 35-гадовы Павел Банькоўскі здзяйсняе самападпал каля Дому ўраду ў Менску. Святлана Ціханоўская і Павел Латушка выступілі ў Радзе Бяспекі ААН.
25 студзеня. Ігар Лосік спыніў галодоўку пасля больш як 40 дзён.
29 студзеня. Генпракуратура анансавала прызнанне нацыянальнага сцяга экстрэмісцкім.
11–12 лютага. У Менску праходзіць Усебеларускі народны сход. На ім прысутнічаюць больш за дзве тысячы дэлегатаў.
18 лютага. Журналісткам «Белсату» Кацярыне Андрэевай і Дар’і Чульцовай вынеслі прысуд: два гады калоніі.
19 лютага. Пачаўся суд над журналісткай Кацярынай Барысевіч і лекарам шпіталю хуткай дапамогі Арцёмам Сарокіным.
Працяг будзе…
