Журналіста «Народнай Волі» Міхала Карневіча затрымалі 22 студзеня і з пятніцы яго трымалі ў ізалятары часовага ўтрымання ў Горадні. Сёння над журналістам прайшоў суд, у выніку якога яго аштрафавалі за рэпост у сацсетках на 800 рублёў.
Пасля суда Міхала вызвалілі.
Паводле папярэдняй інфармацыі, у пятніцу пасля абеду да яго наведаліся з ператрусам. З якой нагоды і якія службы мелі да яго прэтэнзіі – дакладна не вядома. Суседзі кажуць, што ў яго канфіскавалі тэхніку, паведамляе «Народная Воля».
У рэдакцыі газеты распавялі, што прыкладна за тыдзень да таго, як у ягонай кватэры адбыўся ператрус, ён пацікавіўся ў адпаведных чыноўнікаў, як яму атрымаць дазвол на наведванне міграцыйнага цэнтру на беларуска-польскай мяжы, каб падрыхтаваць адтуль матэрыял для газеты. Спачатку папрасілі копію рэгістрацыйнага пасведчання выдання, у штаце якога ён працуе. Потым сказалі: патрэбны яшчэ ліст з рэдакцыі аб тым, што яму даручана падрыхтаваць публікацыю для газеты з міграцыйнага цэнтру. Калі Міхал ужо гатоў быў ехаць у «Брузгі», яму патэлефанавалі і сказалі: не трэба спяшацца, бо там адбыліся нейкія нечаканыя падзеі.
Здабыць інфармацыю пра тое, дзе ўсе гэтыя дні быў Міхаіл Карневіч, было не так проста. Ён – чалавек адзінокі, а інфармацыю даюць толькі блізкім і сваякам, спасылаючыся на закон аб абароне персанальных звестак.
АД, belsat.eu