Лукашэнка пракаментаваў словы Пазняка і заявіў, што не заўважыў акупацыі Беларусі

Аляксандр Лукашэнка адрэагаваў на словы Зянона Пазняка аб тым, што на фоне навінаў пра магчымае расейскае ўварванне ва Украіну адбылася акупацыя Беларусі.

«Я са здзіўленнем прачытаў тое, што ў нас адбылася акупацыя Беларусі. Я як галоўнакамандуючы неяк не заўважыў», – цытуе Лукашэнку БелТА.

Раней Зянон Пазняк у інтэрв’ю «Белсату» заявіў, што пад выглядам вучэнняў «Саюзная рашучасць» адбываецца ціхая акупацыя Беларусі расейскім войскам.

«Я ўжо звяртаюся да тых, хто, прачытаўшы гэта і пачуўшы гэта ў Беларусі (а гэта частка нашага грамадства, частка дзяржавы, дзе я зʼяўляюся прэзідэнтам), і для Зянона хачу сказаць: ніколі, ніколі, прынамсі пакуль я прэзідэнт і вы генералы, мы не дапусцім акупацыі Беларусі. Гэтага не будзе ніколі ні з якога боку. Ні злева, ні справа, ні з захаду, ні з усходу, ні з поўначы, ні поўдня. Ніколі. Мы памром, але гэтага не дапусцім. Не трэба спекуляваць на гэтай тэме», – адзначыў Лукашэнка.

Лукашэнка заявіў, што ў межах вучэнняў на паўднёвых межах Беларусі давядзецца разгарнуць цэлы кантынгент беларускай арміі, і гэта нібыта не звязана ні з якой акупацыяй. «Мы проста хочам абараніць нашую паўднёвую граніцу», – заявіў ён.

Нагадаем, 17 студзеня Аляксандр Лукашэнка зацвердзіў задуму аператыўных беларуска-расейскіх вучэнняў «Саюзная рашучасць – 2022». Яны маюць адбыцца 10–20 лютага на паўднёвых і заходніх межах Беларусі. У Беларусь перакідаюць вайскоўцаў з Далёкага Усходу: гэта падраздзяленні Усходняй вайсковай акругі. Прычым сваякі расейскіх жаўнераў пішуць у сацсетках, што тэрміны «камандзіровак» могуць скласці ад 2 да 9 месяцаў.

Дасюль не вядома, колькі расейскіх вайскоўцаў прыбудуць у Беларусь для ўдзелу ў «Саюзнай рашучасці». Між тым, паводле інфармацыі Telegram-каналу беларускіх чыгуначнікаў belzhd_live, у Беларусь плануецца накіраваць 200 вайсковых эшалонаў з расейскай тэхнікай і жаўнерамі – гэта амаль у 7 разоў больш, чым падчас вучэнняў «Захад-2021».

РР belsat.eu