Дзярждэпартамент ЗША распарадзіўся эвакуяваць сем'і працаўнікоў амбасады ў Кіеве
Дзяржаўны дэпартамент ЗША аддаў распараджэнне сем’ям амерыканцаў, якія працуюць у амерыканскай амбасадзе ва Украіне, пакінуць краіну з-за пагрозы расейскага ўварвання, а таксама дазволіў добраахвотны адʼезд наёмных працаўнікоў амбасады. Пра гэта паведамляе Бі-Бі-Сі.
«Дзяржаўны дэпартамент 23 студзеня 2022 г. дазволіў добраахвотны адʼезд наёмных супрацоўнікаў амбасады ЗША ў Кіеве, а таксама даў указанне аб выездзе чальцоў іхных семʼяў у сувязі з пагрозай ваенных дзеянняў з боку Расеі», – гаворыцца ў заяве Дзяржаўнага дэпартаменту.
Дзярждэпартамент рэкамендаваў амерыканцам, якія цяпер ва Украіне, падумаць аб тым, каб пакінуць тэрыторыю краіны камерцыйнымі рэйсамі.
З лістапада 2021 года Расея канцэнтруе свае войскі на мяжы з Украінаю. Заходнія і ўкраінская выведкі лічаць, што Крэмль плануе маштабнае ўварванне, прычым дзеля гэтых мэтаў можа выкарыстоўвацца тэрыторыя Беларусі.
РР belsat.eu
