Арганізаванай злачыннай групоўкай называюць Лукашэнку, кіраўніка КДБ Церцеля, намесніка кіраўніка МУС Карпянкова і іншых. Заяўнікі вінавацяць іх у злачынствах супраць чалавецтва.
Прадстаўнік групы з больш як дзясятка чальцоў беларускай апазіцыі, адвакат Томаш Віліньскі ў чацвер мае падаць паведамленне ў Нацыянальную пракуратуру Польшчы ў Варшаве аб падазрэнні Аляксандра Лукашэнкі і ягоных паплечнікаў у злачынствах супраць чалавецтва. Падрабязнасці заявы адвакат расказаў выданню «Interia».
Гэтае паведамленне тычыцца злачынства генацыду супраць нацыянальна-палітычнай групы беларусаў, якія ідэнтыфікуюць сябе бел-чырвона-белым сцягам і лозунгам «Жыве Беларусь», дыскрымінацыі і пераследу свайго насельніцтва, злачынствамі супраць іракцаў, злачынстваў супраць палітвязняў-палякаў, згону самалёта «Ryanair», а таксама незаконных пагрозаў на адрас апазіцыйных актывістаў.
Прыкметаў генацыду (па-польску – ludobójstwa) ужо дастаткова, таму такое паведамленне павінна быць зробленае, кажа адвакат. Артыкул 113 Крымінальнага кодэксу Польшчы дазваляе весці судовыя працэсы да замежнікаў, якія знаходзяцца не ў Польшчы, калі гэта вынікае з міжнародных пагадненняў або міжнароднага права.
Абгрунтаванне паведамлення займае больш за 160 старонак, агулам паведамленне адсылае да звыш 30 тысяч розных дакументаў. Задакументавалі некалькі выпадкаў забойстваў на замову рэжыму Лукашэнкі або з падбухторвання рэжымам. Паводле адваката, злачынства генацыду караецца на ўсіх этапах: нават калі лічыць, што яшчэ не ўчыненае, то караць мусяць і за замах.
У складзе меркаванай злачыннай групы, паводле тэксту паведамлення, разам з Лукашэнкам старшыня КДБ Іван Церцель, былы кіраўнік байцоў ГУБАЗіК і цяперашні намеснік міністра ўнутраных справаў Мікалай Карпянкоў і іншыя сілавікі: Павел Голуб, Эдуард Савіцкі, Іван Юркоў, Аляксей Тарасаў…
Імёны тых, каго Віліньскі прадстаўляе, ён не можа раскрываць дзеля іхнай бяспекі, але сярод іншага ён адвакат Паўла Латушкі і Вольгі Сафронавай.
Падобную заяву ў студзені Віліньскі збіраецца падаць у Міжнародны крымінальны суд у Гаазе. Гэтае паведамленне збіраюцца зрабіць нават больш шырокім за «польскае».
АА belsat.eu