Мастак Дэ Лёс разам з «Белсатам» сочыць за галоўнымі падзеямі. Гэтым разам у малюнках – навіны пра кур, расейскіх салдат ды полк Каліноўскага.
Колькі грамадзян Расеі заехала ў Беларусь з моманту абвяшчэння Уладзімірам Пуціным частковай мабілізацыі, невядома. Але паток ахвотных «схавацца ад прызыву» ў нашай краіне не змяншаецца. Што адбываецца на беларуска-расейскай мяжы? Звесткі супярэчлівыя, і людзі кажуць рознае. Дзеіць пашпартны кантроль, але «па лясных сцежках» прайсці можна…
Гісторыя з забаронай росту цэнаў у Беларусі пачалася з прамовы Аляксандра Лукашэнкі на эканамічнай нарадзе 6 кастрычніка. Там ён сярод іншага абураўся такім абыходам забароны на падвышэнне цэнаў: «Расчлянілі дохлую курыцу, упіхнулі ў поліэтыленавы пакет – новы тавар!». Ягонае абурэнне аформілі ў пастановы Савету міністраў і Міністэрства гандлю. Крама не можа закупіць цэлую тушку і разабраць яе самастойна, каб прадаць асобныя часткі. Калі хоча прадаваць асобна крыльцы, то мусіць закупіць асобна крыльцы ў вытворцаў. Але калі хоча прадаваць мяса на шашлык з цыбуляй, воцатам, соллю, перцам і алеем, то можа закупіць для гэтага цэлую тушку.
Дзясяткі крымінальных справаў завялі сілавікі па фактах завышэння цэнаў. Генеральная пракуратура запатрабавала ад Следчага камітэту, МУС і КДБ кантраляваць уведзены Лукашэнкам мараторый на рост коштаў і заводзіць крымінальныя справы. Беларусы ж пакуль не асабліва заўважылі, што цэны не растуць, але з трывогаю паведамляюць, што некаторыя прадукты ў крамах набыць стала складана.
Міністэрства абароны Беларусі пракаментавала інфармацыю аб эшалонах з беларускай ваеннай тэхнікай, якая вывозіцца ў Расею. Па версіі ведамства, гэта звязана з мадэрнізацыяй і перааснашчэннем Узброеных сілаў. Пра гэта паведаміў начальнік упраўлення развіцця сістэм узбраення Узброеных сіл палкоўнік Сяргей Сахарук.
Міністэрства абароны Беларусі 17 кастрычніка паведаміла, што Узброеныя сілы Беларусі «працягваюць выконваць задачы па ўзмацненні аховы дзяржаўнай мяжы»: супраць магчымых «правакацыяў і дыверсантаў» прыгналі БТР, узялі аўтаматы, гранатаёты, дрон.
Аддзел прымусовага выканання Першамайскага раёну сталіцы выставіў на аўкцыён лецішча 75-гадовай Ніны Багінскай. Пра гэта стала вядома пасля з’яўлення адпаведнага лоту на сайце «БелЮрЗабеспячэння».
Дэпутат Вярхоўнай Рады Украіны Аляксей Ганчарэнка, які ўзначальвае міжфракцыйнае аб’яднанне дэпутатаў «За дэмакратычную Беларусь», у каментары «Белсату» распавёў пра сустрэчу з ваярамі палка імя Кастуся Каліноўскага і пра тое, каго ва Украіне лічаць легітымнымі прадстаўнікамі Беларусі.
Малюнкі Дэ Лёс belsat.eu
