Выступ аркестра «Classic Energy orchestra» меўся быць заўтра. Але канцэрт адмянілі на патрабаванне дэпутаткі парламенту Літвы Довіле Шакаліене.
У эфіры радыёстанцыі LRT яна назвала культуру «мяккай сілай аўтарытарных рэжымаў».
«Выканаўца, якога апякае Лукашэнка, не можа быць пажаданай персонай у Літве», – заявіла Шакаліене.
Так дэпутатка сказала пра дырыжора аркестра Юрыя Караваева, які працуе таксама ў Дзяржаўным акадэмічным сімфанічным аркестры і, мяркуе яна, «служыць рэжыму».
На сайце канцэртнай залы паведамляецца пра адмену шоу, там жа апублікаваная заява «Classic Energy orchestra»: «Мы аркестр з Беларусі. Мы супраць вайны! Мы не падтрымліваем агрэсіі. Мы гатовыя прапанаваць удзел у нашых праектах украінскім музыкам, якія цяпер у Вільні».
Аркестр дае канцэрты не толькі ў Беларусі, музыкі актыўна гастралююць па свеце. Наступным тыднем у іх запланаваны выступ у Славаччыне, а ў кастрычніку – у Варшаве і Берліне.
Сяргей Крот belsat.eu