18-гадовага хлопца асудзілі на 3 гады калоніі за просьбы да чальцоў камісіяў лічыць галасы сумленна
У судзе Маскоўскага раёну Берасця 19 жніўня вынеслі прысуд 18-гадоваму палітвязню Раману Карпуку. Цяпер ужо былога першакурсніка абвінавацілі паводле ч. 2 арт. 191 Крымінальнага кодэксу («Перашкода ажыццяўленню выбарчых правоў, права на ўдзел у рэферэндуме») за адпраўку 99 лістоў чальцам камісіяў на рэферэндуме, піша «Вясна».
У лістах былі заклікі лічыць галасы сумленна, паведамляць пра парушэнні на выбарчых участках, а таксама пералік артыкулаў Крымінальнага кодэксу з адказнасцю для фальсіфікатараў. У выніку суддзя Таццяна Лаўранюк прызначыла яму 3 гады калоніі агульнага рэжыму, як і прасіў пракурор Павал Крупеніч.
Хлопца разам з маці затрымалі 8 лютага сёлета. Маці неўзабаве адпусцілі, на судзе яна праходзіла як сведка.
«Я хацеў, каб рэферэндум прайшоў справядліва і паводле закону. Спадзяваўся, што звароты да чальцоў камісіяў гэтаму паспрыяюць», – распавёў Раман Карпук.
Лісты ён рассылаў ад імя Андрэя Грушка і Аляксандра Семенчука – берасцейскіх суддзяў, якія неаднаразова выносілі палітычна матываваныя прысуды.
Якуб Хруст belsat.eu
