МВФ можа даць Беларусі мільярд долараў. Эканаміст: гэта не азначае прызнання Лукашэнкі

Міжнародны валютны фонд вылучыў Беларусі звыш 900 мільёнаў долараў, пра гэта піша расейскае выданне РБК. Сродкі выдаюць у «спецыяльных правах пазыкі» («Special Drawing Rights», SDR).

У пачатку жніўня Міжнародны валютны фонд ухваліў рашэнне падтрымаць краіны пасля складанага для эканомік перыяду, вылучыўшы на гэта $ 650 мільярдаў. Гэтыя грошы раздаюць незалежна ад палітычнай сітуацыі дзеля задавальнення патрэбы ў рэзервах і падвышэння ўстойлівасці дзяржаваў падчас змагання з пандэміяй каронавірусу.

Сам фонд пакуль не падае інфармацыі адносна Беларусі, аднак вядома, што наша краіна не патрапіла ў спіс тых, каму МВФ адмовіў. Адпаведна, выдаваць сродкі не сталі Афганістану, Венесуэле і М’янме.

Фота: АВ / Белсат

Беларускі эканаміст Яраслаў Раманчук кажа, што гэтую дапамогу ад МВФ можна лічыць свайго роду «падушкай бяспекі» для беларускай эканомікі:

«Калі вам зверху падае мільярд долараў – у падарунак ці ў спадчыну – для звычайнага чалавека такія сродкі – гэта дапамога. Ёсць жа выдаткі на абслугоўванне доўгу, ёсць інфраструктурныя праекты, ёсць сацыяльныя праекты і барацьба з COVID-19 – усё тое, што патрабуе сродкаў. І калі ў цябе не вельмі добрае становішча з бюджэтам, як цяпер у Беларусі, тады вельмі добра, што сродкі можна накіраваць на папаўненне рэзерваў, гэта яшчэ большая падушка бяспекі для беларускага рубля».

Беларуская апазіцыя і эканамісты, а таксама амерыканскія кангрэсмены заклікалі МВФ заблакаваць доступ рэжыму Лукашэнкі да гэтых сродкаў, спасылаючыся на палітычны крызіс і парушэнні правоў чалавека ў Беларусі. Яраслаў Раманчук у сваю чаргу заўважае, што выдзяленне нашай краіне сродкаў ад МВФ зусім не азначае прызнання ім рэжыму Лукашэнкі:

«Гэта сведчыць не пра легітымізацыю Міжнародным валютным фондам рэжыму Лукашэнкі, а пра тое, што ёсць пэўныя працэдуры і прававыя механізмы, якія проста аўтаматычна спрацавалі. І натуральна, што гэта ніяк не адгукнецца на самім МВФ, тым больш не справакуе санкцыі супраць яго».

Пры тым само вылучэнне грошай не значыць, што імі дадуць скарыстацца. Сродкі выдаюць не наўпрост, а ў форме «спецыяльных правоў пазыкі» (SDR), якія яшчэ трэба абмяняць на грошы. Эксперты кажуць, што атрыманне сродкаў магчыма заблакаваць на гэтым этапе.

Раней, у каментары belsat.eu кіраўнік Кабінету Святланы Ціханоўскай, яе прадстаўнік у замежных справах Валер Кавалеўскі казаў, што існуе механізм не даць ураду Лукашэнкі атрымаць сродкі праз блакаванне магчымасці абмяняць SDR на грошы. Паводле Кавалеўскага, забягаць наперад не варта, але маюцца тэхнічныя і палітычныя хады, каб спыніць перавод грошай. Працаваць варта ў тым ліку з краінамі, якія могуць абмяняць SDR ураду Лукашэнкі на долары або іншую валюту.

ВК belsat.eu