Агулам на 2021–22 гады збіраюцца вакцынаваць не менш за 60 % насельніцтва. Пакуль атрымалася прышчапіць 13,6 %.
Міністэрства аховы здароўя Беларусі паведаміла 22 жніўня, што першую дозу вакцыны ад COVID-19 атрымалі 1,55 млн беларусаў, а цалкам прайшлі вакцынацыю 1,27 млн чалавек.
Найбольш прышчэпак зрабілі ў Менску: 288,7 тысячы сталічных жыхароў прайшлі поўную вакцынацыю ад каронавірусу. Найменш – у Гарадзенскай вобласці: 127,8 тысячы атрымалі дзве дозы вакцыны (насельніцтва гэтай вобласці ўдвая меншае за Менск).
Статыстыка Міністэрства аховы здароўя адносна каронавірусу выклікае пытанні і шмат у чым выглядае нерэалістычнай.
Паводле звестак сайта «Our World In Data», на сярэдзіну жніўня цалкам вакцынаваныя ад COVID-19 у Літве 53 % насельніцтва, у Польшчы 49 %, у Латвіі 39 %, у Расеі 24 %, ва Украіне 7,1 %.
У Беларусі плануюць паралельна з вакцынацыяй ад каронавірусу праводзіць і вакцынацыю ад грыпу. Другую плануюць распачаць у канцы верасня прынамсі ў Менску. Бясплатна будуць прапаноўваць расейскую вакцыну «Грыпол Плюс», платна таксама прапануюць французскую «Ваксігрып Тэтра».
Адначасова вакцынавацца і ад каронавірусу, і ад грыпу не варта: хоць пакуль невядома, ці будуць ад гэтага пабочныя эфекты, між прышчэпкамі ў Беларусі раяць зрабіць паўзу ў месяц, у Злучаных Штатах – прынамсі 14 дзён.
АА belsat.eu