Лукашэнка звінаваціў Польшчу ў канфлікце з мігрантамі на мяжы. Ён «забыў» адну дэталь: адкуль яны

Прэтэнзіі да Польшчы Лукашэнка выказаў на дыстанцыйным саміце краінаў Арганізацыі дамовы калектыўнай бяспекі.

На лініі паміж межамі Польшчы і Беларусі ўжо 12 дзён жывуць больш за трыццаць мігрантаў, па іх словах, з Афганістану. Сярод ёсць непаўналетняя, жанчыны і нават кот. Яны не могуць патрапіць да Польшчы, іх таксама не ўпускаюць і ў Беларусь. Тэрыторыя ля вёскі Гжыбаўшчызна ў Падляскім ваяводстве, Польшча. 20 жніўня 2021 года. Фота: Белсат

Канфлікт вакол уцекачоў на мяжы Беларусі і Польшчы ўчыніла Польшча, заявіў 23 жніўня Аляксандр Лукашэнка. БелТА пераказвае, якую версію падзеяў ён расказаў на саміце АДКБ.

Афганскія ўцекачы ішлі з Беларусі на Захад, куды «іх самі паклікалі, абяцаўшы ўсіх прыняць», мяркуе Лукашэнка. Ён спаслаўся на нямецкую канцлерку, якая раней асудзіла ягоныя дзеянні.

«Што зрабілі палякі: яны адлавілі, інакш не скажаш, каля 50 чалавек на тэрыторыі Польшчы, якія, як яны прызналіся, ішлі ў Нямеччыну, куды іх паклікала Mutter [«маці» па-нямецку. – «Белсат»] Мэркель, – казаў Лукашэнка. – І пад пагрозай зброі, страляючы па-над галовамі, выціснулі іх на мяжу з Беларуссю. Натуральна, яны ішлі ў Нямеччыну, у Беларусь яны ісці не хочуць. Такім чынам Польшча задаволіла памежны канфлікт на мяжы, парушыўшы Дзяржаўную мяжу Беларусі».

На Беласточчыне ў мясціне Уснаж-Гурны ўжо два тыдні знаходзіцца група з 32 мігрантаў, якія назваліся грамадзянамі Афганістану. Яны сядзяць у ачапленні вайскоўцаў і памежнікаў без магчымасці рушыць куды-кольвек.

Мігранты заяўляюць, што іх 26 дзён везлі ў невядомым накірунку людзі ў масках, ужывалі супраць іх гвалт. Кажуць, што ў Польшчу ім удалося трапіць, але іх затрымалі і загадалі вярнуцца ў Беларусь. З аднаго боку іх не пускаюць палякі, з другога – беларускія службы. Яны застаюцца на беларускім баку «нейтральнай паласы».

Паміж дзвюх межаў

Лукашэнка не згадаў, што мігранты трапілі ўжо трапілі ў Беларусь, якая лічыцца для іх бяспечнай, і што яны спрабавалі нелегальна прабрацца ў трэцюю краіну. Чаму іх трымаюць на мяжы, ён таксама не казаў. Як не казаў і пра тое, што адказным за арганізацыю плыні нелегальнай міграцыі называюць менавіта ягоны рэжым.

Ён наракаў, што цяпер яму «трэба думаць, што з імі рабіць», і апісаў цяжкія ўмовы мігрантаў, якіх беларускія памежнікі не выпускаюць з беларускага памежжа: «без вады, без ежы, пад адкрытым небам», «ноччу ўжо ў нас 7–8 градусаў цеплыні». Пра прапанову гуманітарнай дапамогі беларускаму боку ад Польшчы ён не згадаў.

Польшча прапанавала Беларусі дапамогу для мігрантаў, якія заселі пад польскай мяжой

Канцлерка Нямеччыны Ангела Мэркель на ранейшай сустрэчы з Уладзімірам Пуціным рэзка асудзіла выкарыстанне ўладамі Беларусі, цытата, «ў якасці гібрыднай зброі людзей, якія церпяць бедства». Запрашэння мігрантаў, якія ўцякаюць з Афганістану ў Беларусь, яна не агучвала.

АА belsat.eu

Падпісвайся на telegram Белсату

Hавiны