Для аўтара «Вікіпедыі» Марка Бернштэйна пракурор патрабуе 3 гады «хатняй хіміі»
У судзе Заводскага раёну Менску 23 чэрвеня разгледзелі крымінальную справу палітзняволенага аўтара «Вікіпедыі» Марка Бернштэйна. Пракурор запытаў для яго 3 гады «хатняй хіміі», паведамляюць праваабаронцы.
Прысуд агучаць заўтра, 24 чэрвеня, у 9:45 раніцы.
Справу разглядае суддзя Анастасія Асіпчык.
Мужчыну затрымалі 11 сакавіка 2022 года супрацоўнікі ГУБАЗіКу. У іх тэлеграм-канале было апублікаванае фота з надпісам: «Гэты чалавек распаўсюджвае фэйкавыя антырасейскія матэрыялы». Бернштэйна асудзілі на 15 содняў, а потым завялі на яго крымінальную справу паводле ч. 1 арт. 342 КК (арганізацыя і рыхтаванне дзеянняў, якія груба парушаюць грамадскі парадак, або актыўны ўдзел у іх).
Марк Бернштэйн – знакаміты аўтар «Вікіпедыі» і прадпрымальнік. Ува ўсім свеце ён вядомы як «Pessimist2006» – выбітны рэдактар «Вікіпедыі». Бернштэйн уваходзіць у «топ-50 найлепшых аўтараў на расейскай мове». З 14 чэрвеня 2008 года ён унёс у розныя артыкулы больш за 200 тысяч правак.
Алена Рувіна belsat.eu
