Сітуацыю з прымусовай пасадкай самалёта ў Менску пракаментаваў генеральны сакратар NATO
Генеральны сакратар NATO Енс Стольтэнберг заявіў пра неабходнасць міжнароднага расследавання інцыдэнту з вымушанай пасадкай самалёта Ryanair у Менску і затрыманнем блогера Рамана Пратасевіча.
«Гэта сур’ёзны і небяспечны інцыдэнт, які патрабуе міжнароднага расследавання. Беларусь павінна забяспечыць бяспечнае вяртанне экіпажа і ўсіх пасажыраў», – напісаў Столтэнберг у сваім Twitter.
Раней прэзідэнт Літвы Гітанас Наўсёда заклікаў Еўразвяз і NATO адрэагаваць на аперацыю беларускіх спецслужбаў.
«Я заклікаю саюзнікаў у NATO і ЕЗ неадкладна адрэагаваць на пагрозу, якую беларускі рэжым стварае міжнароднай грамадзянскай авіяцыі. Міжнародная супольнасць павінна прыняць неадкладныя захады, каб перадухіліць паўтарэнне падобных інцыдэнтаў. Я буду гаварыць пра гэта на Еўрапейскай Радзе, якая пачнецца заўтра ў Бруселі», – напісаў ён у Facebook.
Пра тое, што NATO і ЕЗ мусіць адрэагаваць на інцыдэнт у Беларусі заявіў і старшыня камітэта па міжнародных справах брытанскага парламента Том Тугэндхат. «Беларускі тыран Лукашэнка пагражае нам усім», – заявіў ён.
ІІ belsat.eu
