У Конга арыштавалі Аляксандра Зінгмана, бізнесоўца, набліжанага да Лукашэнкі. Яго вінавацяць у гандлі зброяй

У Дэмакратычнай Рэспубліцы Конга быў затрыманы Аляксандр Зінгман – набліжаны да Лукашэнкі беларускі бізнесовец, які займаецца пастаўкамі прамысловай тэхнікі ў Афрыку, паведамляе паўднёваафрыканская онлайн-газета «Daily Maverick».

Зінгмана падазраюць у незаконных продажах зброі.

Афіцыйна Зінгман займае пасаду ганаровага консула Зімбабвэ ў Беларусі і мае два грамадзянствы: ЗША і Беларусі.

Аляксандр Зінгман быў арыштаваны кангалезскай паліцыяй у горадзе Любумбашы (Lubumbashi) у сераду, 17 сакавіка, пасля сустрэчы з былым прэзідэнтам ДРК Жазэфам Кабілёй (Joseph Kabila Kabange). Раней Зінгман згадваўся ў паведамленнях медыяў у сувязі з угодамі аб продажы зброі ў Замбіі і Зімбабвэ. Аднак ён усё адмаўляў.

«Еўрарадыё» паведамляе, што разам з ім быў затрыманы Алег Водчыц – гендырэктар AFTRADE – і італьянскі бізнесовец Паола Пэрсіка.

«Спадар Зінгаман правёў сустрэчы з мясцовымі партнёрамі ў горадзе Любумбашы. Пры канцы сустрэчы, калі ён прыбыў у аэрапорт і збіраўся адправіцца ў Харарэ, ягоны пашпарт забралі. Яго змясцілі ў пакой з двума ягонымі калегамі на некалькі гадзінаў – без магчымасці сесці, без вады, без кантакту з вонкавым светам», – распавялі ў кампаніі AFTRADE DMCC, дылеры беларускай тэхнікі ў Афрыцы.

У сеціве ўжо з’явілася відэа затрымання Зінгмана ў Любумбашы.

Год таму «Белсат» апублікаваў вялікае расследаванне пра бізнес-інтарэсы Зінгмана ў Афрыцы.

АД belsat.eu