Уладзіміра Мартава затрымалі 22 лютага на ягоным уласным лецішчы пад Лепелем, цяпер ён знаходзіцца ў ІЧУ, напісала ў Фэйсбуку віцебская журналістка Таццяна Мацвеева са спасылкай на жонку лекара.
Таццяна Мацвеева таксама паведамляе, што Мартава абвінавачваюць паводле арт.24.23 КаАП РБ («Парушэнне заканадаўства аб масавых мерапрыемствах»). 23 лютага адбудзецца суд. Іншых падрабязнасцяў няма.
«Спадарыня Алена сёння паехала да мужа ў Лепель, хацела перадаць яму лекі. Ён гіпертонік, і гэтыя лекі патрэбныя яму пастаянна. Аднак лекі перадаць не дазволілі. Сказалі, калі раптам вашаму мужу стане кепска, то выклічам хуткую дапамогу, кажа Алена Мартава», – піша Мацвеева.
Уладзімір Мартаў – былы загадчык аддзяленнем анестэзіялогіі і рэанімацыі Віцебскай лякарні хуткай дапамогі.
Мартаў адным з першых беларускіх лекараў адкрыта распавядаў пра рэальную сітуацыю з каронавірусам. Увесну 2021 году з рэаніматолагам не працягнулі кантракт.
ГГ, belsat.eu