23 лютага ўкраінская нацыянальная энергетычная кампаніі «Укренерго» спыніла імпарт электраэнергіі з Беларусі. Пра гэта сведчаць звесткі на сайце прадпрыемства. Тлумачым, што адбываецца.
Паводле сайту «Укренерго», Украіна цалкам спыніла як экспарт, гэтак і імпарт не толькі з Беларусі, але і з усіх суседніх краін.
Раней кампанія паведамляла пра выпрабаванні ўкраінскай энергасістэмы ў адрыве ад энергасістэм Расеі, Беларусі і Еўрапейскага Звязу, які запланаваны на 24-26 лютага.
«Ізаляваная эксплуатацыя – гэта выпрабаванне, якое праводзіцца ў рамках падрыхтоўкі да сінхранізацыі Аб’яднанай энергетычнай сістэмы (ЕЭС) Украіны з кантынентальнай энергетычнай сістэмай ENTSO-E. Гэта прадугледжана Пагадненнем аб умовах будучага абʼяднання ўкраінскай і еўрапейскай энергетычных сістэм і павінна праводзіцца ў два этапы: зімой і летам», – паведамілі ва «Укренерго».
Паводле паведамлення кампаніі, часовае адключэнне энергасістэмы Украіны ад энергасістэмаў Беларусі і Расеі мусіла адбыцца менавіта 23 лютага.
«Вяртанне энергасістэмы Украіны да паралельнай працы з гэтымі энергасістэмамі запланавана на 27 лютага. З 24 па 26 лютага запланавана работа ўкраінска-малдоўскага рэгулятарнага падраздзялення ў ізаляцыі», – паведамлялі ў «Укренерго».
Між тым 22 лютага ўкраінскі дэпутат Аляксей Ганчарэнка заявіў, што «Украіна павінна раз і назаўжды адключыцца ад энергасістэмы Расеі і Беларусі».
«Адключыце ўсе лініі электраперадачы і ніколі не вяртайцеся да адной лініі электраперадачы разам з агрэсарам. Замест 3-дзённага тэставага адключэння неабходна разарваць падключэнне да расейскай сеткі і паскорыць працу ўкраінскай энергасістэмы Еўразвязу», – заявіў ён.
ПС belsat.eu