Падчас сённяшняга візіту на Астравецкую АЭС прэм’ер-міністр Раман Галоўчанка паведаміў, што ў Беларусі прапрацоўваюць магчымасць будаўніцтва другой АЭС. Адпаведнае паручэнне даў Аляксандр Лукашэнка.
Паводле Галоўчанкі, новая станцыя можа зʼявіцца ў іншым рэгіёне краіны.
«Ёсць даручэнне прэзідэнта прапрацаваць пытанне пра будаўніцтва другой АЭС ужо ў іншым рэгіёне Беларусі. Пытанне не вельмі простае, трэба правесці вялікі абʼём навуковых даследаванняў, не толькі эканамічных разлікаў, зыходзячы з комплекснай праграмы развіцця краіны», – сказаў Галоўчанка.
Прэмʼер-міністр таксама расказаў, што магчымасць будаўніцтва другой АЭС у Беларусі разглядаецца пад кіраўніцтвам Нацыянальнай акадэміі навук з удзелам расейскіх адмыслоўцаў. Праект плануюць завяршыць да восені наступнага года і ўнесці адпаведныя прапановы Лукашэнку.
На Астравецкай АЭС сёння пачалі загружаць ядравае паліва ў рэактар другога энергаблоку. Яго гатовасць ацэньваюць на 95 %, а ўвод у прамысловую эксплуатацыю запланавалі на лета наступнага года.
Таксама Галоўчанка расказаў, што першы энергаблок БелАЭС ужо дазволіў краіне заашчадзіць на замяшчэнні імпарту прыроднага газу каля 250 мільёнаў долараў.
АД, belsat.eu