Новым паслом Расеі ў Беларусі стане 71-гадовы Барыс Грызлоў, старшыня Вышэйшага савету «Единой России» і паўнамоцны прадстаўнік Расеі ў кантактнай групе па ўрэгуляванні сітуацыі ва Украіне. Пра гэта паведамляе выданне Znak са спасылкай на крыніцу ў Дзярждуме.
Вядома, што кандыдатуру Грызлова ўжо ўхвалілі ў камітэце па справах СНД. Канчатковае рашэнне павінен прыняць расейскі прэзідэнт Уладзімір Пуцін.
У 2001-2003 гадах Грызлоў займаў пост Міністра ўнутраных спраў РФ, пасля быў старшынёй Дзяржаўнай думы, а з снежня 2011 па красавік 2016 – пастаянны член Савета бяспекі Расейскай Федэрацыі.
Крыніца ў парламенце распавяла выданню, што «проста так на такія пасады людзей узроўню Грызлова не прызначаюць» і не выключае, што за прызначэннем Грызлова можа адбыцца яшчэ большае збліжэнне дзвюх краін і стварэнне агульнага парламента Расеі і Беларусі.
Цяперашні пасол Яўген Лук’янаў будзе адкліканы. Ён працуе ў Менску з сакавіка гэтага года.
АД, belsat.eu