Супрацьстаянне ўладаў і грамадства ў Беларусі працягваецца 469 дзён. Палітычны крызіс у краіне не вырашаецца, а толькі паглыбляецца. «Белсат» падводзіць вынікі дня.
Святлана Ціханоўская паразмаўляла па тэлефоне з Ангелай Мэркель. Палітыкі абмеркавалі сітуацыю ў Беларусі.
Мэркель на пачатку размовы адзначыла, што «гэта добрая магчымасць паразмаўляць, таму што вы былі не вельмі задаволены маёй размовай з Лукашэнкам».
Жыхара «Плошчы Пераменаў» Сцяпана Латыпава этапавалі ў івацэвіцкую калонію №22 (вядомую пад назвай «воўчыя норы»). Палітвязень, якога асудзілі на 8,5 гадоў калоніі, будзе адбываць тут пакаранне, піша «Вясна».
Даслаць ліст палітвязню можна па адрасе:
ПК №22, 225295, Берасцейская вобласць, г. Івацэвічы, ст. Даманава, а/с 20, Сцяпан Сяргеевіч Латыпаў
«Наша ніва» паведамляе, што на мінулым тыдні выйшаў на волю бізнесоўца Віталь Сініцкі.
Паводле інфармацыі выдання, бізнесоўца ўжо заплаціў 10 мільёнаў долараў «кампенсацыі».
22 лістапада ў сталіцы Аўстрыі Вене прайшла міжнародная канферэнцыя аб Беларусі, арганізаваная аўстрыйскім канцлерам Александрам Шаленбэргам.
З лагістычнага цэнтру для мігрантаў каля беларуска-польскай мяжы шпіталізавана больш за сто чалавек з каронавіруснай інфекцыяй. Некаторыя з цяжкай формай захворвання. Пра гэта паведаміла начальнік Галоўнага ўпраўлення аховы здароўя Гарадзенскага аблвыканкаму Людміла Кеда.
Пазней Міністэрства аховы здароўя абвергла гэтую інфармацыю. Паводле ж ведамства, толькі ў аднаго з мігрантаў– ковід з пнеўманіяй, яшчэ ў дваіх – абвастрэнне хранічных хваробаў. У шпіталях Горадні цяпер усяго тры асобы, якія раней жылі ў лагістычным цэнтры «Брузгі».
Былая зняволеная камеры № 15, якая ўсім складам абвяшчала на пачатку лістапада галадоўку на Акрэсціна, напісала зварот да суддзяў. Жанчына заклікае служак закону, якія прызначаюць пакаранні ў палітычных справах, самім прайсці праз арышт у Цэнтры ізаляцыі правапарушальнікаў і спазнаць уласныя пастановы на сваёй скуры: 12 чалавек на 10 м2, начныя пераклічкі, шмоны, сон на падлозе…
СК belsat