У Свіслацкім раёне 21 верасня беларускія памежнікі знайшлі на беларуска-польскай мяжы іракца ў непрытомным стане, паведамляе прэс-служба Дзяржаўнага памежнага камітэту.
У цяжкім стане ўцякач быў дастаўлены на памежную заставу, куды выклікалі брыгаду хуткай дапамогі. Пасля першаснага агляду медыкаў высветлілася, што мужчына ў коме і мае відавочныя прыкметы пераахаладжэння. Пры сабе ў замежніка знойдзены пашпарт грамадзяніна Іраку і адмоўны ПЛР-тэст польскай медустановы.
Згодна з запісам, зробленым у польскай карце неадкладнай медычнай дапамогі, 20 верасня польскія памежнікі выявілі маладога чалавека ў дачным доме і на месцы паказалі медыкам. Падчас агляду дактары зафіксавалі шокавы стан, ваніты, скаргі на болі ў назе, крывавыя пашкоджанні ад калючага дроту.
Са словаў беларускіх памежнікаў, польскія медыкі не сталі шпіталізаваць пацярпелага, а толькі выдалі мужчыну абязбольвальныя і адправілі назад на мяжу.
Цяпер пацярпелы дастаўлены ў Свіслацкі цэнтральны раённы шпіталь. Ён прытомны, яму аказваецца дапамога.
АД, belsat.eu
