Амбасадар Беларусі ў Афганістане і Таджыкістане Алег Іваноў у эфіры АНТ заявіў, што на яго думку «Талібан» дэманізуюць прапагандысты, а самі талібы «не абавязкова нясуць зло», паведамляе Zerkalo.io.
Ён заявіў, што «заходняя прапаганда доўгія гады малявала талібаў толькі чорнай фарбай», а афганскае грамадства ў цэлым стомлена ад вайны.
«На жаль, у большай ступені заходняя прапаганда доўгія гады малявала талібаў толькі чорнай фарбай, як, напэўна, што большая частка рэлiгiйных плыняў на ўсходзе. Гэта проста дэманізацыя руху. Разумееце, не могуць дэманы 30-мільённы краіну на працягу 2-3 тыдняў забраць», – заявіў Іваноў.
Ён знайшоў і станоўчыя змены ў краіне падчас кіравання талібаў.
«Я, напрыклад, не згодны, што талібы абавязкова нясуць зло, разбурэння, наркатрафік і гэтак далей. Калі талібы былі ва ўладзе ў канцы дзевяностых – так, было вельмі шмат няправільнага, з нашага пункту гледжання, – тым не менш наркавытворчасць знізілася ўдвая. А за апошнія 20 гадоў у 10 разоў вырасла. Вы ведаеце, калі ўрад Гані лавіў наркакур’ера, наркагандляра – гэта суд, адвакаты, турма… «Талібан» проста расстрэльвае на месцы », – адзначыў плюсы «Талібану» Іваноў. Ён таксама падкрэсліў, што талібы змагаюцца з арганізацыяй Ісламскай Дзяржавы і таксама расстрэльваюць іх прадстаўнікоў на месцы.
Сам амбасадар зараз знаходзіцца ў Таджыкістане.
Талібы кіравалі Афганістанам з 1996 па 2001 гады, прыйшоўшы да ўлады пры падтрымцы Пакістана падчас грамадзянскай вайны. Большасць краін свету не прызнала іх легітымнасці.
У Афганістане жывуць каля 38 млн чалавек. Каля паловы з іх – этнічныя меншасці. На поўначы краіны жывуць вялікія грамады таджыкаў і ўзбекаў, якія могуць уцякаць ад талібаў, баючыся этнічных чыстак. Іран і Пакістан цяпер закрылі межы для афганскіх уцекачоў.
Рух «Талібан» быў заснаваны ў 1994 годзе. У 1996-м яго войскі ўпершыню захапілі сталіцу краіны Кабул і абвясцілі ўтварэнне Ісламскага эмірату Афганістан.
На падкантрольнай талібамі тэрыторыі ўсталяваўся рэжым, заснаваны на строгім выкананні нормаў шарыяту. Пад забаронаю былі тэлебачанне, музыка і музычныя інструменты, выяўленчае мастацтва, алкаголь, кампʼютары ды інтэрнэт. Жанчынам забаранялі працаваць, лячыцца ў дактароў-мужчынаў, зʼяўляцца ў грамадскіх месцах без мужа ці блізкага сваяка-мужчыны, наведваць школы.
У кастрычніку 2001 года ЗША разам з хаўруснікамі пачалі антытэрарыстычную аперацыю, у выніку якой рэжым талібаў упаў.
У 2014 годзе аперацыя ў Афганістане скончылася, і заходнія саюзнікі пачалі выводзіць свае войскі. Гэтым скарысталіся талібы і аднавілі баявыя дзеянні супраць урадавых войскаў.
15 жніўня 2021 года Кабул другі раз упаў пад ударамі «Талібану».
МГМ, belsat.eu