Польскі «Прэс-клуб» уганараваў журналістак «Белсата» спецыяльнай узнагародай імя Дарыюша Фікуса «за нязломнае выкананне журналісцкіх абавязкаў ва ўмовах, якія вымагаюць агромістай асабістай адвагі». Палітзняволеная заснавальніца беларускага «Прэс-клубу» Юлія Слуцкая ўзнагароджаная прэміяй Міжнароднай асацыяцыі прэс-клубаў за свабоду слова.
Узнагароду Кацярыне Андрэевай і Дар’і Чульцовай называюць знакам салідарнасці з усімі рэпрэсаванымі журналістамі Беларусі. Прэмію імя Дарыюша Фікуса, польскага журналіста і выдаўца, ладзяць з 1998 году, і гэта першы раз, калі ёй уганаравалі не палякаў.
Іншыя ўзнагароды прэміі сёння атрымалі журналісты Onet.pl Януш Швэртнэр і Анджэй Станкевіч за матэрыялы пра схільных да суіцыду ЛГБТ-дзяцей і «каронавірусных шулераў з ураду», а таксама журналіст «Gazeta Wyborcza» Яцэк Гарлуковіч за матэрыял пра польскіх фанатаў нацызму.
Кацярына Андрэева і Дар’я Чульцова ў няволі ўжо больш за сем месяцаў. Іх затрымалі 15 лістапада 2020 года за стрым з жорсткага разгону падчас акцыі памяці Рамана Бандарэнкі і разбурэння сілавікамі народнага мемарыялу. Кацярыне і Дар’і выставілі абвінавачанне паводле ч. 1 арт. 342 («Арганізацыя і рыхтаванне дзеянняў, што груба парушаюць грамадскі парадак») Крымінальнага кодэксу. 18 лютага 2021 года суддзя Фрунзенскага раённага суда Менску Наталля Бугук пакарала Кацярыну і Дар’ю 2 гадамі пазбаўлення волі ў калоніі агульнага рэжыму. Журналістак прызналі палітычнымі зняволенымі.
Прадстаўнікі беларускага «Прэс-клубу» (які, як і польскі, уваходзіць у Міжнародную асацыяцыю прэс-клубаў) таксама за кратамі. Фігурантаў «справы Прэс-клубу» затрымалі 22 снежня 2020 году. Абвінавачанні заснавальніцы ўстановы Юліі Слуцкай, а таксама яе фінансаваму дырэктару Сяргею Альшэўскаму, праграмнай дырэктарцы Але Шарко, аператарам Пятру Слуцкаму і Дзянісу Сакалоўскаму былі выстаўленыя 31 снежня: іх вінавацяць ва «ўхіленні ад сплаты падаткаў у асабліва буйным памеры». Праваабаронцы прызналі фігурантаў справы палітычнымі зняволенымі, патрабуюць іх вызвалення.
belsat.eu