Святлана Ціханоўская 21 чэрвеня ў Бруселі заклікала міністраў замежных справаў ЕЗ быць паслядоўнымі ў палітыцы і захоўваць цвярозы розум. Пра гэта паведамляе выданне «Politico».
Паводле яе, міністр замежных справаў Беларусі Уладзімір Макей ужо вывучае магчымасць угоды, як у 2016-м, калі Еўразвяз скасаваў санкцыі супраць Беларусі, спасылаючыся на «паляпшэнне» стасункаў з Менскам і вызваленне шасці палітзняволеных.
Цяпер Макей можа прапанаваць перавесці журналістаў з турмы пад хатні арышт.
«Я заклікала міністраў: не гуляйце больш у гэтую гульню, – кажа Святлана Ціханоўская. – Будзьце паслядоўнымі ў сваёй палітыцы, бо інакш гэта шлях у нікуды. Пакуль не будуць выкананыя патрабаванні грамадзянскай супольнасці: вызваленне палітвязняў, перамовы з грамадзянскай супольнасцю і новыя выбары – ніякага скасавання санкцыяў. Я думаю, што міністры гэта вельмі выразна разумеюць».
У адказ на сцверджанне, што санкцыі нашкодзяць звычайным грамадзянам, яна сказала: «Людзі пакутуюць не праз санкцыі. Яны пакутуюць праз беззаконне».
Нагадаем, што кіраўнікі МЗС краінаў Еўразвязу 21 чэрвеня прынялі рашэнні аб пашырэнні чорнага спісу ў дачыненні фізічных і юрыдычных асобаў Беларусі на 78 чалавек і 8 кампаніяў. Таксама яны далі згоду на сектаральныя санкцыі. Абмежаванні закрануць нафтавую і калійную прамысловасць, а таксама банкаўскі сектар. Іх мусяць ухваліць 24–25 чэрвеня.
Апроч таго, у гэты дзень свой санкцыйны спіс пашырылі ЗША, уключыўшы ў яго 16 фізічных і 5 юрыдычных асобаў, у тым ліку КДБ, унутраныя войскі, УУС Берасцейскага аблвыканкаму, ЦІП на Акрэсціна і ГУБАЗіК. Да санкцыяў далучыліся Канада, Вялікая Брытанія і Украіна.
А Паўночная Македонія, Чарнагорыя, Сербія, Албанія, Ісландыя, Ліхтэнштэйн і Нарвегія падтрымалі авіяцыйныя санкцыі Еўразвязу супраць уладаў Беларусі.
МГ belsat.eu