Прэс-служба Лукашэнкі назвала Нагорны Карабах «вызваленымі тэрыторыямі». А пасля перадумала
Аляксандр Лукашэнка раніцай 22 траўня правялі тэлефонную размову з прэзідэнтам Азербайджану Ільхамам Аліевым.
Лукашэнка і Аліеў абмеркавалі становішча ў абедзвюх краінах, абмяняліся думкамі па актуальных пытаннях. Гэтак, Лукашэнка падзякаваў Аліеву за падтрыманне і пастаўкі ў Беларусь нафты, а той у адказ распавёў аб сітуацыі на армяна-азербайджанскай мяжы.
Таксама бакі абмеркавалі напрамкі супрацы і рэалізацыю мінулых дамоўленасцяў.
«У бліжэйшы час у Беларусь прыбудзе азербайджанская дэлегацыя спецыялістаў па горадабудаўніцтву, разам з беларускімі калегамі будзе прапрацаваны план пачатку будаўнічых работ у рэгіёне», – паведамляе прэс-служба Лукашэнкі.
Як паведамляе «Наша Ніва», раней у гэтай фразе замест «у рэгіёне» згадваліся «вызваленыя тэрыторыі». Магчыма, гаворка ідзе пра тэрыторыі самаабвешчанай армянскай рэспублікі Нагорнага Карабаху, на якія ўвайшла азербайджанская армія.
Прэс-служба Аліева пакуль маўчыць пра перамовы.
МГ belsat.eu
