Усе мігранты пакінулі ТЛЦ у Брузгах, паведамляе Дзяржаўны памежны камітэт Беларусі. Ноччу 22 сакавіка частка вярнулася ў Ірак, астатнія часова расселеныя па іншых месцах.
«Усе замежнікі, якія часова знаходзіліся ў транспартна-лагістычным цэнтры, пакінулі яго», – гаворыцца ў паведамленні памежнага камітэту.
Ноччу 22 сакавіка, 98 чалавек а 2:55 вылецелі з Менску ў Эрбіль эвакуацыйным рэйсам, які быў арганізаваны пры дапамозе Міжнароднай арганізацыі па міграцыі. Астатнія мігранты расселеныя па гасцініцах і санаторыях і чакаюць наступных эвакуацыйных рэйсаў, каб вярнуцца дамоў. Паводле памежнікаў, мігранты самі пра гэта папрасілі.
«Рашэнне ўцекачоў вярнуцца ў свае краіны шмат у чым прадыктавана ўсведамленнем бессэнсоўнасці чакання і абыякавасцю краінаў ЕЗ у рашэнні іхных праблемаў», – сцвярджае беларускі памежны камітэт.
Згодна з інфармацыяй Беларускага таварыства Чырвонага Крыжа, на мінулых выходных у ТЛЦ у Брузгах заставаліся 409 мігрантаў.
Польская памежная ахова паведамляе, што не спыняюцца спробы мігрантаў незаконна перайсці мяжу з беларускага боку.
ГГ belsat.eu
