За скаргі аб парушэннях падчас «рэферэндуму» назіральніка з Віцебску выклікалі ў пракуратуру на прафілактычную размову.
Віцяблянін Вадзім Кузьмін зарэгістраваўся назіральнікам на рэферэндум ад партыі левых «Справядлівы свет». Калі ў першы дзень датэрміновага галасавання ён наведаў выбарчыя ўчасткі ў Чыгуначным раёне Віцебску, то адразу заўважыў парушэнні: не вывешаныя спісы сябраў выбарчых камісіяў, скрыні для бюлетэняў апячатаныя так, што пралазіць кулак.
Пакуль ён пісаў скаргі ў акруговую камісію ды пракуратуру, яму паведамілі, што назіраць за выбарчым працэсам ён не зможа. Галоўная прычына – каронавірус:
«Праз каронавірус у краіне, дзеля вашай бяспекі, для захавання вашага здароўя, мы адмаўляем вам у магчымасці назіраць. Да таго ж у нас на ўчастку ўжо ёсць тры назіральнікі».
Не паспеў Вадзім Кузьмін прыйсці дадому, як яму патэлефанавалі з пракуратуры і запрасілі прыехаць для прафілактычнай размовы. А калі ён не прыедзе ў пракуратуру, то пракурорскія работнікі прыедуць да яго.
Такіх гасцей у сваёй кватэры назіральнік бачыць не жадае, бо з ім жыве 92-гадовая хворая маці.
АШ/ПС belsat.eu