Крыніцы паведамілі пра звальненні дырэктара Тэатру юнага гледача Уладзіміра Савіцкага і дацэнта БДУ Максіма Шундалава.
Пра тое, што 20 студзеня быў вызвалены з пасады дырэктар Тэатру юнага гледача Уладзімір Савіцкі паведаміў тэлеграм-канал BY_culture. Пазней стала вядома, што Савіцкі юрыдычна яшчэ знаходзіцца на пасадзе, але ягонае звальненне будзе неўзабаве аформленае.
Паведамляецца, што меркаванай прычынай звальнення стаў спектакль «Кантрольнае сачыненне» пра канфлікт выпускнікоў з адміністрацыяй школы. Перад прэм’ерай у сацсетках тэатру зʼявілася інфармацыя пра перанос спектакля праз хваробы актораў. Працаўнікі тэатру мяркуюць, што гэтая пʼеса можа быць знятая з рэпертуару.
Заяву на звальненне з уласнага жадання «угаварылі» напісаць і выкладчыка БДУ, кандыдата фізіка-матэматычных навук дацэнта Максіма Шундалава. Пра гэта паведаміла на сваёй старонцы ў «Фэйсбуку» прафесарка кафедры вышэйшай матэматыкі БДУ Наталля Абрашына-Жадаева.
«Я сёння, калі б змагла, то завыла. Чаму? А таму, што паддаўся на ўгаворы Шундалаў Максім, выдатны выкладчык і навукоўца, напісаў па ўласным жаданні. Такіх прафесіяналаў засталося няшмат.
Але больш за ўсё мяне збянтэжыла паведамленне, што калегі з іншых кафедраў пагадзіліся выконваць за яго ягоную нагрузку. Гэта як? Думаюць, што з імі так не зробяць? Што іх такі лёс абміне?..» – напісала прафесарка.
Некалькі дзён таму міністр культуры Беларусі Анатоль Маркевіч заявіў, што з установаў культуры былі звольненыя больш за 300 працаўнікоў, якія займалі «дэструктыўную пазіцыю». Пазней навіна пра заяву міністра была выдаленая са старонцы sb.by.
ЗК belsat.eu
