Савецкі раённы суд Варонежу задаволіў хадайніцтва следства, каб працягнуць арышт ўкраінскай лётчыцы Надзеі Саўчанкі да 30 кастрычніка, перадае «РИА Новости».
Раней абарона Саўчанкі неаднаразова заяўляла пра гатоўнасць амбасады Украіны ў Расеі выплаціць заклад, спачатку ў памеры Ru 0,5 млн, а пазней – Ru 1 млн рублёў. Суд гэтыя прапановы адхіліў.
Сама Надзея Саўчанка паведаміла суду, што знаходзіцца ў Расеі з 24-га чэрвеня, а не з 30-га, як гаворыцца ў судовых паперах.
У бліжэйшы час Саўчанку этапуюць з Варонежа ў Маскву для правядзення псіхіятрычнай экспертызы, паведаміў ейны адвакат Марк Фейгін. «Найбліжэйшым часам Надзею Саўчанку змесцяць на месяц у інстытут імя Сербскага (Масква) на судовую псіхолага-псіхіятрычную экспертызу», – заявіў Фейгін.
Саўчанка ваявала на Данбасе ў складзе батальёну «Айдар». Па версіі следства, яна перасекла дзяржаўную мяжу без дакументаў пад выглядам уцякачкі, пасля чаго апынулася ў СІЗА на тэрыторыі Расеі. Сама Саўчанка сцвярджае, што яна была выкрадзена тэрарыстамі і перададзена расейскім праваахоўнікам. Саўчанку вінавацяць у забойстве расейскіх тэлежурналістаў пад Луганскам.
Парашэнка ўзнагародзіў Надзею Саўчанку ордэнам «За мужнасць» III ступені. 27 жніўня лётчыцу судзілі ў Варонежы.
МЯ, belsat.eu, паводле tvrain.ru