Прэзідэнт Венесуэлы Нікаля Мадура абвесціў аб увядзенні ва ўсіх харчовых крамах абавязковай сістэмы сканавання адбіткаў пальцаў. Па словах уладаў, гэты крок накіраваны на барацьбу з недахопам харчоў і кантрабандай.
Чакаецца, што сістэма абавязковай дактыласкапіі ў супермаркетах будзе ўведзеная праз некалькі месяцаў – бліжэй да Новага года.
Апазіцыя краіны рэзка асудзіла гэтыя планы ўраду. На думку крытыкаў, зняцце адбіткаў пальцаў пры набыцці ежы абазначае нармаванне харчавання і парушае недатыкальнасць прыватнага жыцця.
У крамах Венесуэлы нярэдка можна ўбачыць пустыя паліцы. Жорсткая манетарная палітыка і недахоп замежнай валюты робяць цяжкім любы імпарт, а спробы заканадаўча стрымаць рост коштаў не дапамагаюць: вытворцы скардзяцца, што некаторыя тавары каштуюць настолькі танна, што ледзь пакрываюць сабекошт.
Са звестак Цэнтрабанку краіны, на пачатку 2014 года ў крамах Венесуэлы адсутнічала прыкладна чвэрць асноўных прадуктаў харчавання.
Паводле падлікаў уладаў, амаль 40% харчоў, вытворчасць якіх падтрымліваецца дзяржавай, незаконна вывозяцца ў Калумбію, дзе прадаюцца па больш высокіх коштах.
Апазіцыя Венесуэлы абвінавачвае ў эканамічным крызісе правальную сацыялістычную палітыку дзяржавы апошніх 15-ці гадоў, ініцыяваную былым прэзідэнтам Уга Чавэсам.
МЯ, belsat.eu, паводле bbc.co.uk