Кінафестываль «Паўночнае ззянне» сёлета пройдзе пад слоганам «ЯК ДОМА» з 20 па 30 лістапада ў гібрыдным фармаце: бясплатна online, а таксама па квітках offline ў Вільні і Таліне. На фэсце можна паглядзець 29 фільмаў, сярод якіх 15 са Скандынавіі і Балтыі, 3 фільмы спецыяльнай праграмы «Ukraine mon amour», зробленыя ў капрадукцыі паміж Украінай і Нардычнымі і Балтыйскімі краінамі, а таксама 11 беларускіх незалежных фільмаў конкурснай праграмы. Каб паглядзець фільмы, трэба зарэгістравацца.
Усе фільмы будуць даступныя на online-платформе кінафестывалю для прагляду бясплатна, за невялікім выключэннем: з меркаванняў бяспекі фільмы «Калі кветкі не маўчаць» і «Край свету» даступныя толькі offline ў Таліне і Вільні.
Важная навіна гэтага года: карыстальнікі IOS унутры Беларусі змогуць глядзець фільмы online-праграмы «Паўночнага ззяння» не толькі з камп’ютара, але і са свайго айфона або планшэта.
Міжнародная праграма
У 2022 годзе кінафестываль адкрые пранікнёная дакументальная драма з Ісландыі «Уздымі планку», а закрые гісторыя сталення трох школьніц «Дзяўчаты, дзяўчаты». Усяго ў міжнародную праграму ўвайшлі 15 ігравых і дакументальных фільмаў са Швецыі, Даніі, Нарвегіі, Фінляндыі, Ісландыі, Эстоніі, Літвы і Латвіі.
У праграме таксама захапляльны палітычны трылер «Прэзідэнт» (Данія, ЗША, Нарвегія) аб барацьбе Зімбабвэ за дэмакратыю, спрадзюсаваны галівудскімі зоркамі Дэні Гловерам («Смяротная зброя») і Тандзівэ Ньютан («Свет Дзікага Захаду»). Эстонскі «Уку» — хроніка жыцця і прыгод андэграўнднага музыкі Уку Куута і яго маці і творчай партнёркі Мар’ю Куут. Кiнакомікс-драмедзi «Дзіцёнак-ніндзя» пра непажаданую цяжарнасць і прымусовае сталенне.
11 незалежных фільмаў у беларускім конкурсе
У беларускую праграму фэсту ўвайшлі 11 фільмаў. Сярод канкурсантаў ёсць прызёры найбуйнейшых кінафестываляў свету (напрыклад, «Дапаможнік» Паўла Мажара стаў лаўрэатам IDFA, «Спатканне ў Мінску» Мікіты Лаўрэцкага атрымаў прыз Doclisboa, фільм «Мара» Сашы Кулак — удзельнічаў у галоўным конкурсе Ратэрдамскага кінафестывалю, а «Калі кветкі не маўчаць» Андрэя Куцілы — перамог у дакументальным конкурсе Варшаўскага кінафестывалю). Ёсць і такія доўгачаканыя беларускія прэм’еры як «Domum» рэжысёра Максіма Сірага, які больш вядомы шырокай публіцы па кліпах для музычных гуртоў: «Ляпіс Трубяцкой», J:morse, «Без билета».
Для многіх з фільмаў беларускага конкурсу адпраўны пункт так ці інакш гэта падзеі 2020 года ў Беларусі. Беларускія рэжысёры і рэжысёркі ў сваіх працах закранаюць сацыяльныя, палітычныя, сямейныя і асабістыя драмы. Кінематаграфістаў цікавяць гісторыі пра моцных жанчын, пераадоленне ўласных траўмаў, а таксама посттраўматычнага сіндрому пасля пратэстаў і іх жорсткага падаўлення, пра жыццё ў эміграцыі і будаванне ўспрыняцця дому па-за межамі сваёй краіны
На працягу кінафестывалю фільмы беларускай праграмы будзе аглядаць міжнароднае журы, яны абяруць пераможцу беларускага конкурсу. У склад журы ўвайшлі рэжысёр і сцэнарыст Сакарыс Стора (Фарэрскія астравы), прадзюсарка Наталля Лібэт (Украіна), акторка, пісьменніца і рэжысёрка Памела Тола (Фінляндыя).
11 online і offline івэнтаў
Глядачам кінафэсту ў 2022 годзе даступны 11 online і offline-мерапрыемстваў у рамках традыцыйнай Індустрыйнай платформы «Паўночнага ззяння», якая ўключае ў сябе анлайн-размовы, Q&A з рэжысёрамі, панэльныя дыскусіі.
Сярод 11 цікавых і нетрывіяльных івэнтаў: online-гутарка «Змагайся як дзяўчо» з зоркай беларускага баскетбола Кацярынай Сныцінай, дыскусія «Як дома. Выклікі эміграцыі», якая збярэ рэжысёраў беларускага незалежнага кіно, каб паразважаць пра шлях беларускага кіно, а таксама дыскусія «Ніндзя, які разбівае стэрэатыпы», у якой прымуць удзел рэжысёрка Інгвіль Свэ Фліке і выканаўца галоўнай ролі, акторка Крысцін Куят Торп нарвежскага фільма «Дзіцёнак-ніндзя» , а мадэраваць гутарку будзе нарвежскі акцёр і мастацкі кіраўнік талінскага тэатра Vaba Lava Харальд Томпсан Розэнстром.
Унікальная айдэнтыка кінафестывалю 2022 — ЯК ДОМА
Кожны год «Паўночнае ззянне» прэзентуе ўнікальную канцэпцыю, якая выяўляецца ў змесце праграмы, маніфесце, айдэнтыцы і камунікацыі. Слоган і галоўны лейтматыў «Паўночнага ззяння»-2022: як дома. Уся айдэнтыка «Ззяння»-2022 аб адным: аб пошуках дома, аб доме, які мы носім з сабой, аб зменах дома, аб дзеяннях і марах. Усё гэта адлюстравала ў маніфэсце фэсту яго заснавальніца і дырэктарка Воля Чайкоўская.
Гібрыдны фармат & Падтрымка PÖFF (Талін) і Skalvija (Вільнюс)
Упершыню «Ззянне» праходзіць у гібрыдным фармаце: адначасова online, і offline у Таліне і Вільнюсе. Пасля рэгістрацыі глядзець online фільмы «Паўночнага ззяння» можна з 20 па 30 лістапада, яны будуць даступныя 24 гадзіны згодна з раскладам. Паказы фільмаў беларускіх рэжысёраў («Калі кветкі не маўчаць», «Мара») і спецыяльная панэльная дыскусія «Як дома» пройдуць у Таліне дзякуючы калабарацыі «Паўночнага Ззяння» з Талінскім кінафестывалем «Цёмныя ночы». У Вільнюсе адбудуцца паказы фільмаў «Край света», «Shirey Mara» і «Мара» пры падтрымцы кінатэатра Skalvija.
Спецыяльная праграма «Ukraine mon amour»
Праграма «Ukraine mon amour» прысвячаецца Украіне і яе барацьбе за мір і свабоду. У праграму ўвайшлі тры дакументальныя ўкраінскія фільмы, якія былі зроблены ў капрадукцыі з Нардычнымі і Балтыйскімі краінамі. Фільмы распавядаюць пра ваенныя падзеі ва Украіне з розных ракурсаў, у тым ліку пра тое — як гэта, калі ў цябе дома ідзе вайна. Гэта пераклікаецца са слоганам «Ззяння»-2022: як дома.
У спецыяльную праграму «Ukraine mon amour» увайшлі: «Гэты дождж ніколі не скончыцца» украінскай рэжысёркі Аліны Горлавай, «Звонку» украінскай рэжысёркі Вольгі Журбы, «Дом з аскепкаў» дацкага рэжысёра Сымона Лерэнг Вільмонта.
Падтрымайце кінафестываль «Паўночнае ззянне» і яго далейшае развіццё данатам.
