Еўрапейскі вяшчальны звяз (ЕВЗ) апублікаваў спіс краін-удзельніц «Еўрабачання-2022», правядзенне якога запланавана на травень 2022 года ў італьянскім Турыне. У спісе з 41 краіны Беларусь не значыцца, пішуць Naviny.by.
Беларусь прапускае ўжо другое «Еўрабачанне» запар. У сакавіку ЕВЗ адхіліў БТ ад удзелу ў конкурсе пасля таго, як беларускі бок двойчы заявіла кампазіцыі з праўладным палітычным падтэкстам.
Больш за тое, пад няспынным ціскам беларускай і міжнароднай грамадскасці 30 чэрвеня 2021 года было прыпынена сяброўства БТ у ЕВЗ.
Еўрапейскі вяшчальны звяз зыходзіў з таго, што яго чальцы не павінны быць датычнымі да парушэнняў правоў чалавека і свабоды слова. У прыватнасці, БТ ставілася ў папрок дэманстрацыя сюжэтаў з удзелам падвергнутых катаванням апанентаў улады, а таксама звальнення супрацоўнікаў, якія падтрымалі пратэсты.
У выніку Белтэлерадыёкампанія больш не мае доступу да розных сэрвісаў для чальцоў ЕВЗ – абмене навінамі і музычным кантэнтам, трансляцыяў музычных і спартовых мерапрыемстваў, а таксама да ўдзелу ў «Еўрабачанні».
ІІ belsat.eu