Лідарка дэмакратычных сілаў Беларусі Святлана Ціханоўская пракаментавала ўказ Уладзіміра Пуціна аб частковай мабілізацыі ў Расеі, выказалася наконт магчымага ўцягвання Беларусі ў вайну і звярнулася да беларускіх вайскоўцаў.
«Сёння Пуцін афіцыйна прызнаў, што жыццё чалавека нічога не каштуе, калі ягоная «спецаперацыя» за сем месяцаў не прывяла да поспеху. Вайсковая мабілізацыя толькі для віду названая частковай, у канчатковым выніку паміраць ні за што адправяць людзей незалежна ад узросту, прафесіі і вайсковага стажу. І цяпер галоўнае пытанне для нашай краіны, ці ўцягнуць два дыктатары ў гэтую крывавую бойню беларусаў», – зазначыла Ціханоўская.
Паводле яе, ні беларускае войска, ні беларускае грамадства не падтрымваюць вайну супраць Украіны, а ў беларусаў ніколі не было цягі да гвалту ці амбіцыяў заваёўваць чужыя тэрыторыі.
«Апошняя вайна, у якую былі ўцягнутыя беларусы, – гэта трагічны для народу і ганебны для ўлады досвед у Афганістане. Людзей адпраўлялі ваяваць дзеля невыразных палітычных мэтаў, а вярталіся яны адтуль у цынкавых дамавінах. Лукашэнка ўжо шмат разоў ішоў супраць волі народу, але калі ён адпраўляе беларусаў паміраць на вайне – гэта ўсё роўна, што ён заходзіць у дом кожнай беларускай сям’і і сваімі рукамі забівае бацьку ці сына.
Я заклікаю ўсіх беларусаў памятаць: гэты чалавек здаў частку суверэнітэту Беларусі. Ён не ў стане абараніць наш народ ад вайны, ён толькі ўцягвае нас у яе яшчэ больш. Я заклікаю беларускія войскі і ўсіх, хто можа трапіць пад мабілізацыю ў выпадку яе абвяшчэння: не выконвайце злачынных загадаў», – заклікала Ціханоўская.
У выпадку мабілізацыі ў Беларусі Святлана Ціханоўская прапанавала наступнае: не выходзіць на сувязь з ваенкаматамі, калі яны будуць спрабаваць знайсці вас, часова змяніць месца жыхарства, калі трэба, і паспрабаваць запэўніць сваю бяспеку. Таксама паведамляць пра гэта медыям і актывістам. А тым, каго ўжо адправілі на вайну, – складаць зброю.
Таксама Ціханоўская заявіла, што ніводны беларус не мусіць паміраць за амбіцыі Пуціна і памылкі Лукашэнкі.
Алена Рувіна belsat.eu
