Аб'яднаны пераходны кабінет апублікаваў заяву з патрабаваннем вываду расейскіх войскаў з Беларусі

Абʼяднаны пераходны кабінет агучыў заяву з патрабаваннем неадкладнага і поўнага вывядзення ўсіх войскаў і ваенных абʼектаў Расеі з тэрыторыі Беларусі. Дакумент апублікаваны на афіцыйным Telegram-канале выканаўчага органа.

Святлана Ціханоўская (у цэнтры) і прадстаўнікі Аб’яднанага пераходнага кабінету (злева направа): Павел Латушка, Аляксандр Азараў, Валер Кавалеўскі і Валер Сахашчык. Калаж: Белсат

Часовы выканаўчы орган, створаны нацыянальнай лідаркай Святланай Ціханоўскай апублікаваў пастанову, у якая прынятая ў сувязі з прамой пагрозай уцягвання Беларусі ў вайну, страты незалежнасці і суверэнітэту, выкарыстаннем Расеяй падкантрольных міжнародных арганізацый і саюзаў для эканамічнай, палітычнай і культурнай экспансіі, развязваннем РФ вайны супраць Украіны, а таксама працягам эскалацыі канфлікту шляхам абʼяўлення мабілізацыі.

У дакуменце гаворыцца, што ўсе двухбаковыя пагадненні паміж Беларуссю і Расеяй, якія пагражаюць суверэнітэту, незалежнасці і нацыянальнай бяспецы нашай краіны, зʼяўляюцца несапраўднымі.

Абʼяднаны пераходны кабінет лічыць неабходным выхад Беларусі з ваенна-палітычных і эканамічных саюзаў з Расеяй. Увогуле ў заяве агучваецца, што цяпер нашая краіна акупаваная РФ.

Алена Аляксандрава belsat.eu