Неўзабаве кіраўнік Міжнароднай федэрацыі хакею (IIHF) пойдзе ў адстаўку пасля 27 гадоў на пасадзе. У інтэрв’ю з гэтай нагоды ён пагадзіўся з тым, што самай вялікай памылкай былі абдымкі з Аляксандрам Лукашэнкам.
У размове з Рэнэ Фазэлем журналіст швейцарскага выдання «Blick» спытаў: абдымкі з дыктатарам Лукашэнкам былі самай вялікай памылкай у кар’еры?
«Так, я лічу, я мушу гэта прызнаць. Гэта было добра задумана, але ў рэшце рэшт усё пайшло не так, як трэба».
Чэмпіянат свету ў хакеі меў прайсці ў 2021 годзе ў Менску і Рызе. Але шэраг палітыкаў раскрытыкавалі магчымасць правядзення першынства ў Беларусі з увагі на гвалт сілавікоў у дачыненні мірных грамадзянаў і сістэматычныя парушэнні правоў чалавека. Адмовіліся фінансаваць спартовыя спаборніцтвы і буйныя кампаніі. Беларусь пазбавілі права правядзення чэмпіянату. Міжнародная федэрацыя хакею ўрэшце перанесла спаборніцтвы цалкам у Рыгу.
Публікацыя фота Фазэля з Лукашэнкам выклікала хвалю абурэння. На пытанне аб тым, ці быў Фазэль расчараваны гэтым, ён адказаў:
«Так. Я, напэўна, быў наіўны. Я лічыў, што магу зрабіць нешта добрае. Мне давялося схавацца на некалькі дзён. Дзярмовы шторм, даруйце, быў вельмі жорсткі».
Выканаўчы дырэктар Беларускага фонду спартовай салідарнасці Аляксандр Апейкін пахваліў Фазэля за такія словы: маўляў, яго можна часткова прабачыць за адно гэтае прызнанне, бо прынамсі ў яго хапіла мужнасці сказаць гэта публічна.
«Гэта вельмі важнае пасланне ад Фазэля для тых, хто сёння працягвае абдымацца з дыктатарам, пра тое, што гэта таксама стане самай вялікай памылкай у іхным жыцці, – піша Апейкін. – Вось толькі ў адрозненне ад Фазэля яны гэтага яшчэ не зразумелі. Ну ці не маюць мужнасці прызнацца».
Кіраўнік зменіцца і ў Міжнароднай федэрацыі, і ў Беларускай федэрацыі хакею (ФХРБ). Выбары пройдуць у адзін дзень. Не выключана, што абедзве пасады зоймуць беларусы.
8 верасня дысцыплінарная Камісія IIHF пазбавіла кіраўніка ФХРБ Дзмітрыя Баскава (з якім Фазэль таксама абдымаўся) займацца любой дзейнасцю пад эгідай міжнароднай федэрацыі хакею, як на нацыянальным узроўні, так і міжнародным на працягу бліжэйшых пяці гадоў. Выбары новага кіраўніка ФХРБ маюць прайсці ў той жа дзень, калі будуць выбіраць замену Фазэлю: 25 верасня.
Аўтарытэтнае хакейнае выданне «The Hockey News» прапанавала годнага кандыдата на пасаду кіраўніка Міжнароднай федэрацыі: беларуса Сяргея Ганчарова, намесніка Баскава ў ФХРБ. «Еўрарадыё» адзначае, што пасля жніўня-2020 «Ганчароў ніяк не выказваўся, у тым ліку не падпісваў лісты спартоўцаў: ні праўладны, ні супраць гвалту».
АА belsat.eu