Чарговая аварыя здарылася 21 верасня ў Менску, у выніку чаго ў жыхароў мікрараёну Зялёны Луг узніклі праблемы з водазабеспячэннем і электрычнасцю.
Як паведамляе тэлеграм-канал «ЖКХ -23 %», у Зялёным Лузе зніклі электрычнасць, водазабеспячэнне і стацыянарны інтэрнэт. Праз гэта ў тым ліку вымушаныя былі зачыніцца некаторыя крамы.
У «Менскводаканале» паведамілі, што ў сувязі з адключэннем электраэнергіі ў «Менскіх кабельных сетках» у 10:20 часова спынілася абсталяванне помпавых станцый 2-га пад’ёму «Бараўляны» і РПНС «Някрасава».
«У сувязі з гэтым назіраюцца перабоі з водазабеспячэннем у мікрараёне Зялёны Луг, квартале вуліц Някрасава, Бяды, Сурганава, Гамарніка, Мірашнічэнкі, Кальцова, Сядых, Каліноўскага, Лагойскі тракт», – цытуе БелТА «Менскводаканал».
Калі электрычнасць ужо падключылі, то гарачую ваду абяцалі даць да 18:00.
У «Менскводаканале» таксама папярэдзілі пра магчымае пагаршэнне якасці водазабеспячэння.
МГ belsat.eu
