Гурт «Сплин» на рок-фестывалі «Чернозем» у Варонежы прысвяціў песню «Выхода нет» артыстам і музыкам, якія з’ехалі з Расеі, паведамляе тэлеграм-канал «Осторожно, новости».
Лідар гурта «Сплин» Аляксандр Васільеў пачаў выступленне словамі, што ён рады бачыць столькі людзей, у якіх захаваліся міласэрнасць і спачуванне, якія не прымаюць жорсткасць, гвалт і забойствы. А песню «Выхода нет» рок-музыка прысвяціў артыстам і гуртам, якім прыйшлося зʼехаць з краіны па розных прычынах.
«Мы спадзяемся, што настане светлы дзень, калі ўсе вернуцца», – сказаў Васільеў.
Пасля з трансляцыі фестывалю выступ «Сплина» выдалілі. Аргкамітэт фестывалю паспрабаваў апраўдаць выдаленне тым, што нібыта гледачы былі абураныя і сыходзілі з канцэрта:
«Яны прысвяцілі песню ў падтрымку гуртоў, якія з’ехалі, і ў цэлым падчас канцэрту рабілі такія, скажам, недвухсэнсоўныя намёкі, падабраўшы адпаведны рэпертуар, неадназначны, мякка скажам… Аргкамітэт не чакаў гэтага. Публіка па-рознаму рэагавала: хтосьці сыходзіў, хтосьці выказваў незадаволенасць на словах, нехта працягваў слухаць музыку, не звяртаючы ўвагі на выказванні».
Раней з Расеі з’ехалі музычныя гурты «Би-2», «Машина времени», «Аквариум», «Tequilajazzz» і іншыя артысты.
Алена Рувіна belsat.eu