Частка фігурантаў справы ўжо атрымала пакаранне тэрмінам ад 5 да 11 гадоў зняволення, але Следчы камітэт абяцае новыя арышты.
Як сцвярджаюць у СК, падчас расследавання справы палітзняволенай Соф’і Сапегі, якую вінавацілі ў адміністраванні каналу «Чорная кніга Беларусі», з яе інфармацыйных носьбітаў былі атрыманыя звесткі пра «лінію ўзаемадзеяння экстрэмістаў з асобамі, якія пражываюць на тэрыторыі Беларусі». Былі распачатыя крымінальныя справы, праведзеныя арышты.
Паводле СК, у «групе тэхнічнай падтрымкі» каналу налічваліся дзясяткі чалавек – у тым ліку працаўнікі дзяржаўных органаў, былыя праваахоўнікі і асобы, якія мелі доступ да асабістых звестак беларусаў. Менавіта яны «злівалі» інфармацыю пра прадстаўнікоў улады.
У прыватнасці, быў арыштаваны 31-гадовы менеджар мабільнага аператару «БеСТ», які перадаваў асабістыя звесткі адміністратарам «ЧКБ». Яму выстаўлена абвінавачанне ў «распальванні варожасці» (арт. 130 КК).
Агулам у справе «ЧКБ» былі затрыманыя больш за два дзясяткі чалавек. Некаторыя з іх ужо атрымалі пакаранне ў выглядзе 5–11 гадоў пазбаўлення волі.
«Паводле аналагічнай схемы працягваюць выяўляцца сувязі злачынцаў з іншымі грамадзянамі, якія таксама будуць затрыманыя і прыцягнуты да ўсляванай законам адказнасці», – заявілі ў СК.
У канале «Чорная кніга Беларусі» публікаваліся асабістыя звесткі супрацоўнікаў сілавых ведамстваў і чыноўнікаў.
Нагадаем, на дзень 21 ліпеня ў Беларусі прызнаныя палітычнымі вязнямі 1259 чалавек.
Глеб Нержын belsat.eu