У Беларусі плануюць павысіць да 40 гадоў узроставы цэнз для абрання на пасаду прэзідэнта. Пра гэтыя змены ў Канстытуцыю 20 ліпеня на пасяджэнні канстытуцыйнай камісіі распавёў яе старшыня, кіраўнік Канстытуцыйнага суда Пётр Міклашэвіч, перадае БелТА.
У раздзеле Канстытуцыі «Прэзідэнт. Парламент. Урад» прапанавана захаваць прэзідэнцкую форму кіравання.
«Для займання пасады прэзідэнта ўсталяваць больш высокі ўзроставы цэнз – 40 гадоў, цэнз аселасці – сталае пражыванне ў Рэспубліцы Беларусь не менш за 20 гадоў непасрэдна перад выбарамі, цэнз грамадзянства – не мець грамадзянства замежнай дзяржавы», – заявіў Пётр Міклашэвіч.
Цяпер паводле Канстытуцыі прэзідэнтам Беларусі можа быць абраны грамадзянін Беларусі па нараджэнні, не маладзейшы за 35 гадоў, які валодае выбарчым правам і пастаянна жыве ў краіне не менш за 10 гадоў непасрэдна перад выбарамі.
Таксама прапаноўваецца змяніць тэрміны перабывання на пасадзе прэзідэнта: «адна і тая ж асоба можа быць прэзідэнтам не больш за два тэрміны».
Акрамя гэтага Міклашэвіч паведаміў, што ў Беларусі плануюць увесці праваабарончы інстытут – упаўнаважаны ў правах чалавека.
У раздзел «Пракуратура, камітэт дзяржаўнага кантролю» прапаноўваецца ўнесці раздзел аб упаўнаважаным у правах чалавека з вызначэннем ягонага канстытуцыйнага статусу, парадку прызначэння і асноўных паўнамоцтваў.
Міклашэвіч сказаў, што «такім чынам уводзіцца новы праваабарончы інстытут у мэтах дадатковай гарантыі абароны правоў і свабод чалавека для эфектыўнай сувязі паміж грамадзянамі і ўладай у праваабарончай сферы».
АД, belsat.eu