21 чэрвеня пасля цяжкай хваробы пайшоў з жыцця праваслаўны святар Сяргей Гардун. Пра ягоную смерць паведаміў у Facebook былы прэс-сакратар Беларускай праваслаўнай царквы Сяргей Лепін.
«Памёр прафесар протаіерэй Сергій Гардун. Чалавек, які шмат зрабіў для развіцця беларушчыны ў Царкве і Царкве – у беларушчыне», – напісаў ён.
Сяргей Гардун нарадзіўся ў 1959 годзе ў Кобрынскім раёне. Закончыў Менскі дзяржаўны педагагічны інстытут замежных моваў, Маскоўскую духоўную семінарыю і Маскоўскую духоўную акадэмію. Кандыдат багаслоўя (1990), дацэнт (2000).
Быў выкладчыкам Жыровіцкай духоўнай семінарыі, першым прарэктарам Інстытуту тэалогіі імя святых Мяфодзія і Кірыла.
Як старшыня працоўнай групы Біблійнай камісіі БПЦ удзельнічаў у перакладзе на беларускую мову Бібліі. За гэта ў 2019 годзе быў уганараваны прэміяй «За духоўнае адраджэнне». Выступаў за пашырэнне беларускай мовы ў царкве.
Якуб Хруст belsat.eu
