Кіраўнікі МЗС краінаў Еўразвязу 21 чэрвеня далі згоду на сектаральныя санкцыі. Абмежавальныя захады закрануць нафтавую і калійную прамысловасць, а таксама банкаўскі сектар. У чорны спіс ЕЗ трапілі не толькі юрыдычныя асобы, але і фізічныя, набліжаныя да Лукашэнкі.
Адным з першых наступстваў санкцыяў ЕЗ стала тое, што беларускія еўрабонды абваліліся за дзень на 7 %. Інвестары намагаюцца пазбавіцца ад аблігацыяў.
Палітычны аглядальнік Пётр Кузняцоў звяртае ўвагу, што санкцыі – гэта ў тым ліку і дыпламатыя, якая разлічаная не толькі і не столькі на галоўных асобащ канкрэтнага рэжыму, але і на тых, хто забяспечвае гэтаму рэжыму рэальную ўладу. Гэта – сістэма сігналаў, сродак папярэджання і інфармацыйнага ціску. Раней санкцыі ў дачыненні кіраўніцтва Беларусі былі больш сімвалічнымі, піша публіцыст.
«На гэтым фоне беларускі бок заўсёды бадзёры, а топавыя персоны рэжыму пераканаўча даводзілі да сваіх слугаў думку пра тое, што Еўропа нам нічога не зробіць, у еўрапейскіх палітыкаў «няма яек», Парыж так ці інакш усё ўбачаць, галоўнае – слухаць «бацьку», і ўсё будзе вельмі і вельмі добра. Было лёгка і проста рабіць з сябе пераможцы ў «геапалітычным супрацьстаянні».
Сёння санкцыі ўжо сектаральныя і могуць балюча ўдарыць па рэжыме. Але пакуль яны таксама не крытычныя, мяркуе Пётр Кузняцоў.
Эканаміст Яраслаў Раманчук вылучае тры этапы, якія пасля ўвядзення санкцыяў могуць прывесці да знікнення Беларусі.
Першы этап расцягнецца на тры месяцы. Падчас гэтага перыяду будзе назірацца рост рэпрэсіяў і поўнае здушэнне іншадумства.
На працягу 4–8 месяцаў пасля ўвядзення санкцыяў будзе другі этап. Рэпрэсіі працягнуцца. Але дэфіцыт бюджэту можа вырасці да 15 % ВУП. У гэты перыяд адбудзецца вялікая інфляцыя і дэвальвацыя рубля. Крэмль зможа дамагчыся ад Лукашэнкі падпісання інтэграцыйных дамоўленасцяў, і ў нашую краіну прыйдзе не толькі расейскі капітал, але і вайсковыя базы з Усходу.
Трэці этап працягнецца з 9 да 18 месяца. Эканоміка абваліцца. Адбудзецца дэградацыя ва ўсіх сферах краіны. Колькасць пенсіянераў у Беларусі наблізіцца да 3 млн. Палітычны праект «Незалежная Рэспубліка Беларусь» хіліцца да заходу.
Эканаміст звяртае ўвагу, што гэта гіпатэтычны прагноз, але верагоднасць яго можа вырасці, калі Лукашэнка пажадае звязаць сваю асабістую бяспеку, дабрабыт сваёй сям’і з добразычлівасцю Крамля.
Telegram-канал «nic_and_mike» для таго, каб ацаніць эфект ад перспектываў санкцыяў, прапаноўвае цяпер паглядзець, што за апошні год сталася з Беларуссю.
1. Буйны дзяржаўны кантрабандны хаб.
2. Пагроза для суседзяў з пункту гледжання нелегальнай міграцыі.
3. Біялагічная бомба запаволенага дзеяння з прычыны каронавіруса.
4. Пагрозы запоўніць суседнія краіны наркотыкамі.
5. Акт паветранага пірацтва або міжнароднага тэрарызму ў дачыненні самалёта грамадзянскай авіяцыі.
6. Рэальная пагроза знішчэння сістэмы экспартнага кантролю – сістэмы ўліку гандлю зброяй і прадукцыяй падвойнага прызначэння.
7. Прававы дэфолт.
8. Зачыстка грамадзянскай супольнасці, якая, па сутнасці, ператварылася ў вайну з уласным народам.
9. Рэальная пагроза ядравага шантажу рэгіёну аварыямі на БелАЭС.
10. Рэкордная ў Еўропе колькасць рэпрэсаваных і палітычных зняволеных.
Палітычны аналітык Ігар Ільяш у сваім тэлеграм-канале піша пра тое, што абмежаванні – беспрэцэдэнтныя па сваіх маштабах: Еўразвяз упершыню рыхтуе сектаральныя санкцыі, якія закранаюць асноўныя галіны эканомікі. Але якія гэта будзе мець наступствы?
«Я магу адназначна сказаць, чаго не будзе: не будзе захавання статус-кво. Таму што для гэтага ў рэжыму няма рэсурсаў. У кароткатэрміновай перспектыве (ад тыдня да месяца) варта чакаць альбо рэзкага ўсплёску тэрору, альбо тактычных саступак».
СК belsat.eu