Жонка палітвязня Міколы Статкевіча Марына Адамовіч расказала на Facebook пра ліст ад мужа.
У лісце, які Мікола Статкевіч напісаў 13 траўня, палітвязень расказвае, што ён у сваю чаргу атрымаў 4 траўня ліст з Генеральнай пракуратуры аб пазове яму і «падзельнікам» на суму BYN 3,078 млн. Яго справу перадалі ў Гомельскі абласны суд, 20 траўня стала вядома, што яго самога этапавалі ў Гомель.
«Раней чуў з тазіка, што Генпракуратура ўжо наклала для забеспячэння пазову арышт на маёмасць коштам 2 млн, – піша Статкевіч. – Таксама чуў, што хочуць пазбаўляць вайсковых званняў тых, хто звольніўся з сілавых структураў падчас мінулагодніх падзей. Ствараюць вельмі небяспечныя прэцэдэнты, якія могуць бумерангам некалі вярнуцца ім самім і іх блізкім».
На думку Статкевіча, «гэтыя дзеянні могуць быць выкліканыя рэальнай магчымасцю еўрапейскіх сектаральных санкцыяў супраць прадпрыемстваў нафтагазавай галіны».
Мікалая Статкевіча затрымалі 31 траўня 2020 году па дарозе на пікет удзельнікаў прэзідэнцкай кампаніі, вінавацяць у «падрыхтоўцы да ўдзелу ў масавых беспарадках» і «арганізацыі і падрыхтоўцы дзеянняў, якія груба парушаюць грамадскі парадак». Статкевіч заклікаў іншых станавіцца на выбарах «кандыдатамі пратэсту»: удзельнічаць у зборы подпісаў дзеля агітацыйных магчымасцяў, але подпісы не здаваць. У лік «кандыдатаў пратэсту» пагадзіўся ўвайсці ў тым ліку Сяргей Ціханоўскі, якога арыштавалі 29 траўня 2020 году.
Статкевіча і Ціханоўскага збіраюцца судзіць разам з блогерамі Ігарам Лосікам («Беларусь головного мозга») і Ўладзімірам Цыгановічам («MozgOn»), аператарам Ціханоўскага Арцёмам Сакавым і мадэратарам сацсетак «Страна для жизни» Дзмітрыем Паповым.
АА belsat.eu
