Беларускі палітык Павел Латушка расказаў у сваім Telegram-канале пра рэакцыю нямецкіх уладаў на просьбу праверыць выказванні беларускага намесніка міністра ўнутраных справаў Беларусі аб процідзеянні апазіцыі як «тэрарыстам».
Міністр унутраных справаў Беларусі Мікалай Карпянкоў заявіў 2 траўня ў эфіры дзяржаўнага тэлеканалу СТВ, што «радыкальна настроеныя апазіцыянеры» стаяць у адным шэрагу з «міжнароднымі тэрарыстамі», і барацьба з імі будзе ісці «паводле закону контртэрарыстычных аперацыяў». Паводле яго, «радыкалізавалася» ўся «наша неймаверная апазіцыя».
Павел Латушка расцаніў гэтую заяву як адмову ад абмежавання сілавікоў законамі ў дзеяннях супраць палітычнай апазіцыі. Ён папрасіў дзяржаўнага сакратара Міністэрства замежных справаў Нямеччыны Мігеля Бэргера выказаць рэакцыю на заяву Карпянкова – і атрымаў адказ:
«У лісце ў адказ Мігель Бэргер запэўніў, што МЗС Нямеччыны вельмі сур’ёзна ўспрыняў недапушчальныя выказванні Карпенкова, – перадае Латушка. – Амбасадар Беларусі быў выкліканы ў МЗС, дзе да яго была выразна даведзеная пазіцыя Нямеччыны аб недапушчальнасці падобных дзеянняў і выказванняў. Нямеччына будзе цвёрда стаяць на баку тых беларусаў, якія змагаюцца за дэмакратыю, вяршэнства закона і выкананне правоў чалавека».
Раней у пракуратуру Нямеччыны падалі заяву аб здзяйсненні Аляксандрам Лукашэнкам злачынстваў супраць чалавечнасці. Латушка ж яшчэ ў сакавіку запрапанаваў Захаду прызнаць рэжым Лукашэнкі тэрарыстычным.
АА belsat.eu